Nga Gjon Neçaj
Histori njerëzore e trishtë për t’u shfaqur vetëm në telenovela apo në tregime trilluese. Por ja që historia e më poshtme e çiftit Agron Sokol Kuçana dhe Timë Rrustem Tolaj, është më se e vërtetë.
Para disa ditësh, Sokol Kuçana, punonjës në spitalin e “Bajram Currit”, duke gjerbur kafenë e mëngjesit do rrëfente një ndodhi familjare të djalit dhe nuses së tij, një odise e bitisur para 16 vjetësh, e që ende vazhdon e nuk është gati në të sosur…
Përpara, në tavolinë nxorri dy letra, njëra një kërkesë dërguar presidentit të Republikës, e tjetra një shkresë, përgjigja e letrës, që mban datën 08.07.2015.
Ja se çfarë përmban kërkesa e Sokol Kuçanës : ”Jam i detyruar i nderuar president i Republikës t’ju shkruaj për një problem njerëzor dhe human – nënvizon letra – që më preokupon shumë si familje tash 16 vjet. Djali im, Agron Sokol Kuçana, i datëlindjes 1974, në mbarim të luftës në Kosovë, në muajin qershor 1999 është martuar me një vajzë nga fshati Pobergjë, komuna e Deçanit, Kosovë, e quajtur Timë Rrustem Tolaj. Pas martesës i kemi bërë të gjitha dokumentet siç na rekomandoi zyra e gjendjes civile, duke bërë regjistrimin e rregullt të dy bashkëshortëve. Pas një viti, në komisariatin e Tropojës nxorrëm pasaportën shqiptare për Timën, mirëpo pas dy vitesh e mbrapa, zyra e Gjendjes Civile “Bajram Curri” nuk na pajisi me dokumenta, me pretendimin se Tima nuk është shtetase shqiptare. Ndodhur para këtyre kushteve, ne iu drejtuam përsëri në komisariatin e Tropojës, që kërkesën tonë ia përcolli Drejtorisë Rajonale Kukës, e kjo Ministrisë së Punëve të Brendshme, e kjo e fundit presidentit të Republikës.
Më pastaj na erdhi përgjigja nga Presidenca, e cila sqaronte se duhet pritur 3 vjet për të marrë nënshtetësinë shqiptare.
Kanë kaluar 16 vjet dhe, Agron Kuçana nga ‘Bajram Curri’, tashmë me tre fëmijë, të madhin, djalin 15 vjeç, ende nuk ka marrë një përgjigje. Fëmijët e tij ende nuk kanë një nënë biologjike me dokumenta.
“Duke qenë një rast i veçantë dhe shqetësues për fëmijët dhe familjen time, u detyrova t’i shkruaj presidentit, thotë Sokoli, pasi edhe për humanizëm duhet t’u jepet e drejta nipërve të mi të kenë një nënë biologjike me dokumentet e shtetit shqiptar. E përgjigja e presidencës në lidhje me regjistrimin dhe pajisjen me pasaportë shqiptare të Timë Rrustem Tolajt, nuses së djalit, na sugjeronin t’i drejtohemi Ministrisë së Punëve të Brendshme. Dhe deri më tani nuk është marrë një përgjigje konkrete.”
Odiseja e pajisjes së një nëne kosovare me dokument identiteti, për të qenë dhe zyrtarisht shtetase e Shqipërisë, është ndër absurditetet e këtij vendi.
Shpresojmë se organet kompetente do marrin në konsiderate kërkesën e Agronit dhe Timës, që dhe tre fëmijët e tyre të jenë pjesë e pandarë me prindërit në Gjendjen Civile të shtetit shqiptar.
/tesheshi.com/
