Rreth Ilir Metës, president deri para pak ditësh, mund të ketë një tjetër lajm, të barazvlefshëm në bujë me atë videon e famshme me të ndjerin Dritan Prifti, atë që çoi në protestat e 21 janarit 2011.
Fjala është për mundësinë që pikërisht ai, njeriu me inicialet I. M të jetë politikani i lartë që, sipas Autoritetit të Dosjeve, ka qenë bashkëpunëtor i Sigurimit të Shtetit.
Autoriteti i dosjeve e ka zbuluar këtë rast, por ligji e pengon që të ndërmarrë veprime.
Kjo pasi në hartimin e këtij ligji është vendosur që ata politikanë që kanë certifikatë të pastër sigurie nga komisionet e ngritura gjatë fundit të viteve 1990, komisionet Mezini-Bezhani, të mos ndëshkohet nga autoriteti aktual.
Kjo klauzolë ka shërbyer, sipas autoritetit të dosjeve, që disa politikanë të jenë imun nga e shkuara e tyre edhe pse në disa raste për ta është vërtetuar se kanë qenë pjesë e sigurimit të shtetit.
Ky ka qenë rasti i politikanit të lartë I.M, i cili ka paraqitur certifikatë sigurie të pastër nga komisionet e mëparshme, por që të dhënat tregojnë se ai ka qenë pjesë e sigurimit famëkeq të shtetit.
Autoriteti i dosjeve i ka cuar Kuvendit të Shqipërisë materialet për politikanin I.M
Në letrën dërguar Kuvendit, autoriteti kërkon gjithashtu që të korrigjohet ligji për të verifikuar edhe këta funksionarë që kanë dalë të pastër në komisionet e mëparshme.
“Autoriteti për Informimin mbi Dokumentet e ish-Sigurimit të Shtetit, institucion i pavarur, i krijuar për qëllime të informimit të individëve, institucioneve, studiuesve dhe mediave me dokumentet e ish-Sigurimit të Shtetit, ushtron prej 5 vitesh veprimtarinë e tij, bazuar në ligjshmëri, transparencë dhe bashkëpunim me institucionet shtetërore. Në kuadër të punës së përditshme me përpunimin e materialeve të ish-Sigurimit të Shtetit, së fundmi Autoriteti është ndeshur me informacione dhe të dhëna mbi një personazh me profil të lartë politik. Institucionit iu kërkua nëpërmjet postës elektronike që të verifikohej figura e shtetasit I. M. në dosje të klasifikuara të ish-Sigurimit të Shtetit. Konstatimi u shqyrtua me përgjegjësi dhe materialet u bënë të njohura për të gjithë anëtarët e zgjedhur. Me vendimin nr. 321, datë 26.07.2022 të Autoritetit, të dhënat iu përcollën Kuvendit të Shqipërisë.Për identifikimin e materialeve të tilla dhe informimin mbi to, Autoriteti kërkon të kthehet vëmendja te ndryshimet e ligjit nr. 45/2015 ‘Për të Drejtën e Informimit për Dokumentet e ish-Sigurimit të Shtetit të Republikës Popullore Socialiste të Shqipërisë’ i ndryshuar dhe problematikat e vështirësitë e përsëritura në zbatimin e disa dispozitave”, thuhet në letër.
Ky zhvillim vjen në kohën kur Ilir Meta iu është rikthyer politikës së ditës si kryetar partie – LSI e shndëruar në Parti e Lirisë – me synimin për të rrëzuar qeverinë. /tesheshi.com/
