Nga Blendi Gashi
Kosovarët më 22 tetor do t’u drejtohen edhe njëherë kutive të votimit, në zgjedhjet lokale. Ato parlamentare që sapo përfunduan, treguan ftohjen e madhe të elektoratit me dy forcat e mëdha, PDK-LDK, duke preferuar të paprovuarën e madhe, Vetëvendosjes.
Dhe ky është një sinjal që pas katër muajsh, partitë e udhëhequra nga Kadri Veseli dhe Isa Mustafa mund t’i humbin bastionet e tyre, nën kërcënimin e VV-së së Visar Ymerit.
Ja ç’thonë zyrtarët e partive si dhe analistët politikë rreth asaj që mund të ndodhë zgjedhjet lokale, referuar rezultatit të atyre parlamentare.
Tinka Kurti, zyrtare për media në Vetëvendosje thotë se trendi i rritjes së partisë së tyre është duke vazhduar, dhe shton se qytetarët kanë arsye të jenë të pakënaqur si me qeverisjen qendrore ashtu edhe me qeverisjet lokale që udhëhiqen prej partive tjera
“Me fitoren e Vetëvendosje-s në nivel qendror qytetarëve u është rritur edhe më shumë shpresa, ndaj dhe VV pret edhe një fitore të përbashkët me qytetarët në zgjedhjet e 22 tetorit”, thotë Kurti për tesheshi.com.
Pal Lekaj, nga AAK thotë se zgjedhjet lokale dallojnë thelbësisht nga ato nacionale, sepse vota kërkohet me drejtpërdrejt dhe njohja e qytetarëve për pretendentët për kryetar të komunës dhe kandidatë për asamble është më e madhe.
“Prandaj duke u bazuar në këto gjëra them se do të kemi rikthim të Aleancës në komuna ku ka qeverisur dhe do të jetë konkurente shumë serioze për tu shtrirë edhe në komuna të tjera në kuptimin e qeverisjes. Por me një fjalë, nuk kanë të përbashkëta të mëdha, për të mos thënë fare, rezultatet e zgjedhjeve nivel vendi me ato për komuna”, thotë Lekaj për tesheshi.com.
Ja ç’mendojnë analistët…
Ligjëruesi i shkencave politike në Universitetin e Uinçesterit në Angli, Seb Bytyçi, mendon se zgjedhjet lokale do të ndikohen nga rezultati i zgjedhjeve parlamentare, mirëpo jo në mënyrë të njëtrajtshme në të gjitha komunat.
Sipas tij, në shumë komuna do të ketë një revolucion zgjedhor ngjashëm me nivelin qendror, por shton se nuk do të thotë që Vetëvendosje do të fitojë në të gjitha komunat që doli e para më 11 qershor.
“Qytetarët aty do të ndëshkojnë partitë në pushtet duke votuar për atë parti/kandidat që ka shansa më shumë për të fituar, pra shumëçka varet nga fuqia paraprake e subjektit. Gjithashtu, duhet patur parasysh edhe koalicionet parazgjedhore që do të krijohen dhe ato që bëhen mes rundit të parë e të dytë në zgjedhje lokale. E këto do të ndikohen nga koalicioni për formimin e qeverisë qendrore. Kështu që zgjedhjet nacionale do të kenë ndikim te ato lokale, mirëpo rezultatet në komunat individuale nuk do të reflektojnë gjithmonë rezultatin qendror”, thotë Bytyqi, për tesheshi.com
Politologu Mentor Tahiri, pohon se në ambientin e krijuar politik, votuesi do të vazhdojë të shprehë edhe më shumë pakënaqësinë karshi politikës së zbrazët, për çka do të prodhojë rezultate edhe më të dobëta për partitë e “krahut të luftës”, derisa vota do të shkojë edhe më shumë në konton e Lëvizjes Vetëvendosje.
“Zgjedhjet e fundit treguan që Vetëvendosje ka një shtrirje të gjërë në gjithë vendin. Por ajo që bie në sy është sidomos krijimi i bastioneve të reja në qendrat urbane si Ferizaj dhe Gjilani, si dhe thellimi i përkrahjes në kryeqytet. Kjo do të ketë veç tjerash edhe efekt psikologjik te votuesi dhe do të reflektohet në zgjedhjet lokale gjatë këtij viti”, thotë Tahiri, për tesheshi.com.
Edhe pse thotë se zgjedhjet lokale kanë specifiken e vetë, mendon se me pak dallime do të jetë trendi i zgjedhjeve nacionale.
“E mira e këtyre zgjedhjeve që tani u mbajtën, qëndron në faktin se votuesi u dha mesazhe të qartë partive lidhur me seriozitetin e kandidaturave. Thjeshtë, më nuk mund të kandidohet kushdo dhe sido”, pohon Tahiri.
Ndryshe, presidenti Thaçi pasi ka marrë vendim që zgjedhjet lokale të mbahen më 22 tetor 2017, ka udhëzuar Komisionin Qendror të Zgjedhjeve që t’i ndërmarrë të gjitha veprimet e nevojshme për organizimin dhe mbajtjen e zgjedhjeve lokale, në përputhje me vendimin e tij dhe legjislacionin në fuqi. /tesheshi.com/
