“Eshtë një krim. Eshtë një krim kundër njerëzimit,” do të thoshte në fillim të kësaj jave kandidati presidencial francez në një intervistë për një televizion algjerian në lidhje me historinë koloniale të Francës në Algjeri.
“Eshtë vërtet barbar, dhe është pjesë e së shkuarës me të cilën duhet të përballemi duke u kërkuar ndjesë atyre kundër të cilëve i kryem këto akte,” ishte përshkrimi i tij për kolonializmin francez në atë vend.
Komentet e tij nuk u pritën aspak mirë në Francë, dhe shumë prej rivalëve në zgjedhjet e ardhshme presidenciale reaguan me zemërim.
Pavarësisht kësaj, Emmanuel Macron, një ish-ministër ekonomie dhe një kandidat i pavarur centrist në zgjedhjet për kreun e shtetit në Francë, i ka mbrojtur pikëpamjet e tij përmes një videoje të publikuar mbrëmjen e së enjtes në faqen zyrtare të lëvizjes së tij politike, “En Marche!”
“A jemi të dënuar sot të jetojmë gjithmonë në hijen e kësaj traume mes këtyre dy vendeve?”, pyet Macron.
“Eshtë koha për ta mbyllur këtë brengë. Prandaj duhet të kemi kurajën për t’i thënë gjërat.”
“Përgjegjësia jonë sot është t’i pajtojmë kujtimet, për të krijuar një marrëdhënie të re midis Francës dhe Algjerisë,” thotë kandidati presidencial që kryeson në anketimet para zgjedhjeve të prillit dhe majit.
Franca nuk ka kërkuar asnjëherë ndjesë zyrtarisht për kolonizimin e përgjakshëm të Algjerisë. /tesheshi.com/
