Asnjë vendi tjetër nuk i janë kërkuar kaq shumë reforma, si Kosovës, që të mund të anëtarësohej në Këshillin e Evropës, thotë në një opinion hartuesja e raportit për Kosovën, Dora Bakojanis, sipas https://europeanwesternbalkans.com/.
”Kur Asambleja Parlamentare e Këshillit të Evropës (KiE) më emëroi si Raportues për kërkesën e Komitetit të Ministrave për opinionin e parlamentit për aplikimin e Kosovës, të gjithë ishin në dijeni të lidhjeve të mia të veçanta me Serbinë dhe popullin serb”, shkruan Bakojanis.
“KiE është një organizatë ndërkombëtare – e dallueshme nga BE-ja – që i është përkushtuar vetëm promovimit të demokracisë, shtetit të së drejtës dhe të drejtave të njeriut në Evropë”, shton ajo.
“Kështu, ndryshe nga organizatat e tjera ndërkombëtare, procesi i anëtarësimit ka qenë historikisht i thjeshtë (46 nga 49 vende evropiane janë tashmë anëtare), pasi anëtarësimi kërkohet përpara se qytetarët të kenë akses në mjetet demokratike të KiE”, thekson Bakojanis.
“Për të arritur një opinion pozitiv, u deshën 300 ditë, misione në Prishtinë, Mitrovicën e Veriut dhe Bruksel, një ekip avokatësh të specializuar dhe dhjetëra takime me qeveritë, ambasadorët, kryetarët serbë, përfaqësues të Kishës Ortodokse Serbe, OJQ dhe organizata ndërkombëtare”, shkruan ajo.
“Asnjë anëtari kandidat nuk i është kërkuar ndonjëherë të ndërmarrë kaq shumë reforma para se të sillet për diskutim mbi anëtarësimin e tij në organizatë. Kjo është ndoshta arsyeja pse 83% e parlamentit votuan pro raportit”, shton Bakojanis.
“Përkundrazi, u përmend qartë se APKE nuk do të mbante asnjë qëndrim për shtetësinë. Në fakt, gjatë fjalës sime në seancë plenare, nënvizova se nëse do të kisha qenë e detyruar nga Komiteti i Ministrave të shpreh mendimin tim për shtetësinë, nuk do ta kisha marrë kurrë raportin dhe do të rreshtohesha me pozicionin e vendit tim duke mohuar kështu çdo konsideratë për anëtarësimin e Kosovës në organizatë. Sidoqoftë, kjo e fundit nuk u kërkua kurrë. Njohja ose mosnjohja e shtetësisë është dhe do të mbetet prerogativë e shteteve”, thekson ajo.
“Përkundër gjithë sa u përmend më lart, unë u sulmova personalisht nga lidershipi i Serbisë. Më cilësuan si një tradhtare të paturpshme që minon marrëdhëniet dypalëshe të vendeve tona. Asgjë nuk mund të jetë më larg nga realiteti”, shton Bakojanis. /atsh/
