Ca çaste humori krejt të zakonshme mund t’i kushtojnë postin imamit të njohur të Tiranës Ahmed Kalaja, ushtrues i kësaj detyre në xhaminë e Rrugës së Kavajës.
Ditë më parë ai u shfaq në një video në çaste shoqërie me dy futbollistët e kombëtares, Lila dhe Sadiku, në dhomën e këtyre të fundit në prag të ndeshjes me Italinë. Në në një moment ka qenë Lila ai që po rrëfente mbi një prift që vinte gjithnjë për t’i bekuar para ndeshjeve, ku ai luan me Janinën në kampionatin grek.
E qeshura gjatë këtij rëfimi është konvertuar në lajm të tipit “skandal” nga disa media, duke u përkthyer si tallje me klerikë të një besimi tjetër. Në fillim Kalaja e më pas Lila kërkuan ndjesë për rrëshqitje në planin etik, edhe pse kanë mohuar që kanë patur për qëllim përçmimin e ndokujt, aq më pak një figure klerikale.
Por nuk e ka menduar kështu drejtoria e Komitetit të Kulteve që, sipas një lajmi të shpërndarë nga media të ndryshme, ka kërkuar nga KMSH shkarkimin e imam Ahmed Kalasë. Deri më tani nuk ka asnjë vendim të tillë. /tesheshi.com/
