Ambasada franceze në Tiranë ka reaguar pas lajmeve të shpërndara një ditë më parë nga presidenca shqiptare në lidhje me vizitën e pritshme të Presidentit të Francës, François Hollandë në Tiranë në fillim të muajit mars.
Në një reagim diplomatik, selia e Parisit zyrtar ka korrektuar Presidencën, për të mos thënë hedh poshtë mënyrën e trajtimit të këtij informacioni duke bërë të ditur se çdo njoftim i shpërndarë nuk është i saktë. Më poshtë po sjellim njoftimin e plotë të ambasadës.
“Ambasada e Francës në Shqipëri u uron autoriteteve dhe popullit shqiptar paqe, lumturi dhe begati për vitin 2017. Ky vit do të jetë i pasur me ngjarje shumë të rëndësishme.
Pikërisht, Presidenca e Republikës franceze na ka vënë në dijeni në lidhje me dëshirën e Presidentit François Hollande të vizitojë Shqipërinë gjatë muajit mars. Në këtë kontekst nuk ka akoma asnjë informacion të besueshëm mbi programin e kësaj vizite, i cili do të përcaktohet, kur të vijë koha, mes autoriteteve franceze dhe shqiptare, sipas rregullave protokollare”.
Siç u paralajmërua dhe dje në lajmin e tesheshi.com, pritet një debat në lidhje me aspektet protokollare të ardhjes së kreut të shtetit francez në Shqipëri. Presidenca, në lajmin e saj thotë se ftesa i është bërë nga kreu i shtetit, Nishani. Por me gjasë, ftesa mund të ketë ardhur nga tjetër drejtim, pasi Hollande, sipas Kushtetutës franceze ka dhe status ekzekutiv, pra është dhe homolog i Ramës sipas kompetencave që gëzon. /tesheshi.com/
