Nga Blendi Gashi
Ramush Haradinaj dhe partia e tij AAK shihen vendimtare në përcaktimin e koalicionit të ardhshëm qeverisës, për çka tashmë ka një “luftë” të heshtur mes PDK-së dhe Vetëvendosje-s.
E para synon që me Ramushin për herë të parë të ndërtojë të ashtuquajturin koalicioni e “krahut të luftës”, kurse e dyta ta rrëzojë PDK-në nga pushteti me ndihmën e AAK-së.
Por gjatë qëndrimit katër mujor në Francë, ku Haradinaj u mbajt “peng” pas një flet-arresti të Serbisë, ai ka bërë të qetin në intervistat e shumta mediale duke mos u deklaruar se me cilin krahë do vendos të bashkohet, kur ka tashmë zëra se ka një marrëveshje të heshtur PDK-AAK.
Pyetja që tashmë shtrohet pas lirimit të Ramushit është nëse ai do përkthejë në vota përkrahjen e madhe që mori pas arrestimit në Francë, apo thjesht do mbetet vetëm një anë emocionale e patriotike e treguar nga shqiptarët?
Kur u lirua nga Haga, Ramushi edhe pse u prit si hero, nuk arriti të përkthejë në vota përkrahjen e madhe, ndonëse mund të ketë ndikuar tepihu i kuq që ia shtroi atë kohë kryeministri Thaçi dhe më pas përpjekja e vazhdueshme e Haradinajt që me çdo kusht të bëhet kryeministër, gjë që Thaçi nuk pranoi.
Andaj, sërish shtrohet pyetja nëse triumfin e sërish ndaj Serbisë, qytetarët do t’ia kthejnë me një fitore të brendshme, apo thjesht ka qenë një pëkrahje për një ish-komandat të UÇK-së, që vjen nga një familje që dha shumë për lirinë e vendit?
Ja ç’thonë analistët…
Analistët politikë thonë se vet ecja e Haradinajt do përcaktojë nëse elektorati do e mbështes më shumë apo do ia rikthej shpinën.
Leon Duhanaj, njohës i rrethanave politike shprehet se Haradinaj as në rastin e Hagës, as pas ndalimit në Slloveni, nuk diti të përfitoj politikisht, pasi në rastin e parë iu ofruar ish-kryeministri Thaçi, kurse në rastin e dytë bëri deklarata jo të pamatura dhe më pas iu bashkangjit Vetëvendosje-s në luftën pa parime për pushtet.
Duhanaj, thotë se Haradinaj para vetës sërish ka një shans të mirë për të përfituar politkisht, pra ta ngrit partinë, por varet sa do arrijë ta shfrytëzojë.
“Gjatë qëndrimit në Francë, është treguar i urtë dhe nuk ka bërë ndonjë gaf në deklarimet e tij për mediat. Tani nëse i qëndron besnik kësaj mënyre të sjelljes, mund ta kapitalizoj këtë frymë pozitive për të në favor të rritjes së mbështetjes për AAK-në. Kësaj radhe nuk e ka rrezikun e të identifikuarit me z. Thaçi si kundërshtarë politik pasi që ai tashmë është President. Çdo bashkëpunim politik nuk do ta dëmtonte, nëse ruan subjektivitetin, identitetin e tij politik, përveç nëse i futet aventurës së bashkëpunimit me Vetëvendosjen, e cila do të synonte ta dëmtoj duke e shfrytëzuar për kapitalizëm për vete, ashtu siç bëri herën e fundit. Por, besoj që kësaj radhe z. Haradinaj, nuk e bën gabimin e njëjtë”, thotë Duhanaj për tesheshi. com.
Analisti tjetër, Nexhmendin Spahiu, poashtu mendon se nëse Ramushi arrin ta ruaj kreditin e fituar pas arrestit në Francëderi e zgjedhje, mund të marrë rezultate shumë më positive se në zgjedhjet e kaluara.
“Thjeshtë i duhet të mos bëj ndonjë veprim qe e diskrediton. Ai (Rmaushi) shpesh di kur i ka punët më së miri me i prish punë vetit”, thotë Spahiu për tesheshi. com.
Kurse sa i përket se me cilën parti AAK mund të ligj koalicion pas zgjedhor, Spahiu shprehet se “është vështirë me parashiku rezultatin e zgjedhjeve”.
Ndryshe, sipas sondazheve të ndryshme të bëra gjatë kohës sa Haradinaj ka qëndruar në Francë, Aleanca ka shënuar rritje të ndjeshme ku shumica prej tyre e kanë renditur si parti të tretë në vend. /tesheshi.com/
