Si asnjë herë deri tani, mbyllet pa asnjë incident protesta e opozitës në Prishtinë. Pas dy orësh manifestim në sheshin “Skënderbej” tre partitë kryesore të opozitës kanë zhvilluar për herë të parë një protest pa incidente. Por siç duket qëllimi ka qenë mos prishja e atmosferës së festës së pavarësisë.
Krerët e opozitës kanë thirrur protestën e radhës pas 10 ditësh, pikërisht më 27 shkurt.
Pikërisht fjalimi I liderit të Vetëvendosjes, Visar Ymeri ka shënuar edhe përfundimin e protestës së sotme.
Kryetari i VV-së ka bërë të ditur se protesta e radhës do të mbahet nëse nuk jep dorëheqje Qeveria.
Ymeri ka bërë thirrje edhe për një protestë për të premten kur mbahet seanca e Kuvendit të Kosovës. Para Ymerit kanë folur edhe kryetari i AAK-së Ramush Haradinaj dhe ai i Nismës Fatmir Limaj.
“Kosova sot ka popull që i del Zot shtetit dhe vetvetes. Zajednica, demarkacioni kanë marr fund, tani duhet të marrin fund edhe Hashimi e Isa”, deklaroi Visar Ymeri.
Ai ka shtuar se protesta e sotme është një manifestim për drejtësi, sepse kjo Qeveri është Qeveri e padrejtësive, ku njerëzit pasurohen brenda natës.
Lideri i Aleancës për Ardhmërinë e Kosovës Ramush Haradinaj, i është drejtuar sot masës në protestën e organizuar, duke u thënë se vetëm qytetarët mund të vendosin dhe ta rrëzojnë këtë qeveri.
“Po mos të ishit ju, kjo nuk do të bëhej. Ju sot jeni të obliguar për të zbatuar këtë vendim menjëherë
Nga sot nuk vendos askush tjetër pos jush. Ju e bëni Kosovën e lirë dhe me u ndi mirë të gjithë ata që e donë Kosovën e lirë. Ju dhe vetëm ju jeni republika. Ju jeni sovrani, liria dhe republika. Ju jeni Pavarësia. Ju dhe vetëm ju e bëni pavarësinë”, tha Haradinaj.
Kryetari i Nismës për Kosovën, Fatmir Limaj para protestuesëve ka deklaruar se populli ka hequr legjitimitetin pushtetit të dhunshëm dhe vendi duhet të shkojë në zgjedhje.
“Ne do të vazhdojmë në kauzën tonë të drejt. Askush nuk ka mundur t’i rezistojë kauzës tonë dhe nuk do të mundin as këta”, tha ai.
/tesheshi.com/
