Diçka e paimagjinueshme për natyrën politike të Berishës ka ndodhur së fundit me të. Ai është tërhequr nga një status i ashpër, tejet “i guximshëm”, në adresë të personit më të rëndësishëm ndërkombëtar të Reformës në Drejtësi, shefes së Operacionit Ndërkombëtar të Monitorimit, Genoveva Calavera. Kujtojmë se kjo strukturë që ajo drejton – OMN – është “roja kryesore” e reformës, miratuar nga dy palët në Shqipëri.
Calavera mbahet si ndër emrat kryesorë të Brukselit në Shqipëri.
Berisha shkroi, në stilin e tij, te famëmadhi por dhe te famëkeqi sipas jë pjese të publikut – “Qytetari Dixhital” – se Calavera është blerë me lekë droge.
Kjo bëri që të vijë një reagim i fortë nga Brukseli, pas së cilit, gjë që kur nuk ka ndodhur me Berishën në kaq vite protagonizëm politik, ai është tërhequr, madje me një ndjesë.
“Statusi im bazohej në një fake news dhe unë besoj plotësisht te përgënjeshtrimi që bëri komisioneri Varhelyi që unë e vlerësoj si njeri serioz, transparent dhe një njeri që përpiqet të ndihmojë Shqipërinë me aq mundësi që ka.
Nuk ka arsye të dyshoj në përgënjeshtrimin e tij.
Tërheq me ndjesë statusin tim me bazë një fake news. Besoj që komentet e tjera janë të tepërta”, tha Berisha në një intervistë televizive.
Por nga ana tjetër, sulmin ndaj Calaverës, sikur të ishte një koordinim opozitar, e ka vijuar dhe Kryemadhi, duke ofruar shifrën e lartë të një rroge që sipa saj, diplomatja e Brukselit e merr nga lekët e shqiptarëve.
Pikëpyetja është: Ndërsa Berisha kërkoi ndjesë, çdo të bëjë Kryemadhi? /tesheshi.com/
