Një prej mesazheve të së shtunës në rrjete nga ana e kryeministrit Rama, nuk ka qenë aq i zakontë. Në replikë me rivalin demokrat Basha, në kuadër të aferës “Babale”, shefi i qeverisë ka paralajmëruar një goditje ndaj kreut demokrat të hënën, duke shkruar:
“Qetësohu Lulëzim! Mos bëj nevrikun kot xhan se s’ta ka fajin askush që e bëre Shqupin Kinostudio. Tani fli deri pasnesër kur të kem ca të reja për ty e për tërë lehaqeniet e klubeve politike e mediatike, që siç dhunuan 10 ditë rresht një vajzë dhunojnë përditë publikun shqiptar”, shkroi Rama.
Reagimi ishte pikërisht ndaj një mesazhi të Bashës, kur ky i fundit nuk u pajtua me verdiktin e Krimeve të Rënda që “Babalja” ishte një sajesë, duke nisur rrjedhimisht dhe procedimet penale.
“Kush priste diçka tjetër nga prokuroria Rama-Marku-Xhafa-Prela, është vetëm naiv. Agron Xhafaj që i fshihej prej 5 vitesh drejtësisë me ndihmën e vëllait, u largua me urgjencë drejt Italisë, që të mos përballej me hetimin dhe akuzat që prokuroria e kapur i quan sot montim.
Sot çdo shqiptar e kupton më qartë se kurrë pse Edi Ramës i duhej prokuroria nën komandën e tij. Me aktin e sotëm, Rama i ka vënë zjarrin shtetit ligjor. Tani nuk ka mbetur rrugë tjetër për të vënë banditët para përgjegjësisë, përveç rrëzimit me çdo mjet të mafias në pushtet”, ishin fjalët e Bashës. /tesheshi.com/
