Prej sot, i ashtëquajturi prej mediave greke si “Eskobari i Ballkanit”, Klement Balili është një person të cilin e ndjek nga pas një urdhërarrest ndërkombëtar dhe, nuk dihet sa herët apo vonë do ndodhë prangosja e tij.
Qëkur emri i tij ka zënë majat e klasifikimit në “hit-parade”-in e lajmit, ai është shfaqur vetëm njëherë në TV kur bëri një deklaratë, e cila iu atribuua PD-së dhe qëndrimeve të saj karshi tij.
Dhe siç u pa, publiku nuk u ballafaqua me ndonjë “Eskobar” të frikshëm, me një portret hijerëndë, tek i cili të lexohej pesha e krimit – një “Eskobar” që kontrollin e drejton një trafik droge të atyre përmasave nuk ka se si të jetë ndryshe – por një njeri krejt normal, ashtu siç Keli Balili ishte në përditshmërinë e tij.
Mediat italiane kanë shkruar për jetën e tij mondane në Milano a gjetkë, por Keli Balili vetëm për mondanitet nuk është njohur, ku dhe veshja e tij ka qenë e një niveli mesatar, sa nganjeherë tw ngjante me një roje nate. Është e natyrshme që për pjesën më të madhe të publikut, pas etiketimit të tij si “Eskobar”, të krijohet identikiti i njeriu me një stil të shfrenuar jetë, që noton në lluks, e që të shtie tmerrin po e pate përballë.
Por ja që kjo nuk ekziston dhe, pas Lazaratit të zhytur në kanabis, ku niveli i krimit ishte sa ai i Përmetit, pra në kuota aq të ulëta sa që nuk i korrespondonte statusit kriminal të drogës, po ashtu dhe Keli Balili në imazhin, sjelljen, marrëdhëniet me njerëzit, të të gjitha niveleve, dhe përgjithësisht në staturën publike, nuk ka patur asgjë prej “Eskobari”.
Madje as në postin e drejtorit të Transporteve, sektor ky ku leku milet për qejf, në tre vjet drejtim ai nuk është përfolur qoftë dhe për rryshfetin më të vogël.
Për mbi të gjitha, është dhe fakti se për Keli Balilin, dhe përgjithësisht xhinsin e Balilajve në pellgun Sarandë – Delvinë, nuk ekziston asnjë dosje kriminale.
Në CV-në e tij jetësore nuk do hasësh sherre, përplasje të dhunshme, atentate, vrasje të aluduara a gjëra të ngjashme, të zakonshme këto për njerëz të përfshirë në trafiqe droge.
Është e vërtet që vila e Keli Balilit në Stjar të Delvinës është e veçantë, por kjo në stil, më shumë se sa në madhështi. Kishte dhe një X5, por as njëra e as tjetra nuk e demonizonin deri në atë pikë sa t’i ngjishnin vulën e një “Eskobari”.
Ky portret i tij nuk është një mbrojtje për të, por një realitet që duhet ditur, ashtu siç duhen ditur nga ana tjetër posedimi i një resorti marramendës si Santa Kuaranta apo Club Factory, që po ashtu nuk i përgjigjeshin imazhit tejet njerëzor të Keli Balilit në realitet. /tesheshi.com/
