Policia franceze ka sekuestruar 72 armë zjarri dhe më shumë se 3000 fishekë nga shtëpia e Alain Delon në Ducey, Franca qendrore, thanë të martën prokurorët e Montarzis-it.
I njëjti përditësim foli për armë zjarri, kryesisht të klasit A dhe B, si dhe armë kolektive. Në fakt, nga hetimet paraprake rezultoi se aktori i njohur “nuk kishte asnjë autorizim që i lejonte të mbante armë zjarri”. Me këto të dhëna vijon hetimi ndër të tjera për akuzën e “marrjes dhe mbajtjes pa leje të armëve të kategorisë A, B dhe C”. Hetuesit në pronën e aktorit 88-vjeçar gjetën edhe një poligon qitjeje.
Ky zhvillim erdhi pas nisjes së një tjetër hetimi prokurorial, lidhur me marrëdhëniet e tensionuara të Alain Delon me fëmijët e tij. Ky kontekst, i kombinuar me shqetësimet për gjendjen e brishtë të shëndetit të aktorit, bëri që, sipas Le Parisien, prokuroria të shqyrtonte në detaje çështjen e armëmbajtjes së aktorit francez.
Në fakt, vlen të theksohet se në një intervistë të fundit për Elle, Anouska Delon, vajza e aktorit, ka shpjeguar se ajo “shkon gjithmonë me truprojën e saj” në shtëpinë e babait të saj, për shkak të pasionit të tij për armët, duke shtuar se ai mban një “koleksion mjaft i madh”. Anouska Delon shtoi gjithashtu se vëllezërit e saj, kur janë në Ducey, “shëtisin të armatosur në shtëpi”, duke besuar se janë “në Perëndimin e Egër”.
Sipas Le Parisien, kjo dëshmi e shtyu prokurorin e Montarzis të hapte një hetim të ri, i cili rezultoi në sekuestrimin e “arsenalit” të Alain Delon.
Ky lajm i pazakontë nga Franca vjen pas atij në Shqipëri, ku një artisti iu gjetën armë në shtëpi. Bëhet fjalë për të Orges Shijakun, të birin e të madhit të pikturës, Sali Shijaku.
Edhe Orgesi është piktor, skulptor dhe restaurator. Policia shkoi në banesën e tij, pasi të birit adoleshent iu gjetën dy thika me vete që mbante në kushte shkolle. Aty, Policia gjeti gjashtë armë në total: pushkë, shotgun, armë sportive, armë gjysmë automatike, sasi municioni luftarak të kalibrave të ndryshëm, dy mjete prerëse, si dhe dy palë targa. /tesheshi.com/
