Familja Latifi nga fshati Satapetkë, komuna e Sopishtës në Shkup, që në orët e hershme të mëngjesit të ditës së Fiter Bajramit, hapi dyert për t’i pritur mysafirët e saj. Në mesin e tyre, të parë që erdhën për urime ishin fqinjët maqedonas nga fshati Rakotincë. Është kjo një traditë e cila ruhet me dekada të tëra, ndërsa i pari i shtëpisë nuk e fsheh kënaqësinë që asgjë nuk ua ka prishur bashkëjetesën me vite të tëra.
“Tradicionalisht fqinjët vijnë të na urojnë Bajramin. vijnë më shumë persona të komunitetit maqedonas dhe ne i mirëpresim”, thotë kryefamiljari.
Mysafirët tradicionalisht u shërbyen me bakllava dhe kadaif, ndërsa në sofrën e Bajramit kishte bonbone dhe llokum. Megjithatë, për ta nuk është edhe aq e rëndësishme se çka ka në tryezë. Thonë se vetëm kanë ardhur për t’ua uruar festën fqinjëve me të cilët e ndajnë përditshmërinë.
“Kjo traditë është e kahmotshme. Ata vijnë te ne, ne shkojmë te ata, dhe kështu bashkëjetojmë paqësisht. Këtu nuk ka pasur kurrfarë problemi mes shqiptarëve dhe maqedonasve. Çdoherë kemi jetuar mirë. Në orën 12 të natës nëse më kanë thirrur u kam dalë në ndihmë dhe anasjelltas. Dëshiroj që edhe të rinjtë ta vazhdojnë këtë traditë”, u shpreh Tomislav Aleksovski, banor i Rakotincës
Prej këtu mysafirët kanë shkuar për t’ua uruar Fiter Bajramin edhe familjeve tjera myslimane në këtë anë.
“Ka grupe edhe në çiflik edhe këtu. Ne tani do të shkojmë në një shtëpi tjetër dhe deri kah ora 3 do i kalojmë. Por do hamë më pak ëmbëlsira, që mos të na rritet sheqeri”, tha Zoran Simonosvski, tjetër banor i Rakotincës.
Ata kujtojnë se më herët nën patrozhan e komunës, edhe festat krishtere edhe ato muslimane janë kremtuar në mes të fshatit, por viteve të fundit komuna i ka ndërprerë këto organizime. Megjithatë banorët kanë vazhduar traditën duke uruar njëri tjetrin në mënyra të organizuara dhe individuale.
“Festohej dhe ishte bukur, në mes të fshatit, në ndonjë fushë ose para komunës, por tani ajo traditë në dy mandatet e fundit u ndërpre. Kjo ishte përmes komunës, por mendoj se do të vazhdojmë”, tha Tomislav Aleksovski.
Ata dëshirojnë që dhe gjeneratat pas tyre, ta vijojnë këtë traditë bashkëjetese ndëretnike e ndërfetare. /tesheshi.com/
