Ka kaluar pa u vënë re, pa u theksuar më saktë, një detaj i pazakontë në 360-gradëshin e Zhejit të enjten, ku i ftuar ishte kryeministri Rama. Ky i fundi e largoi ish-mikun e tij të rinisë nga rrethi kofidencial duke i diktuar jo “ti”-në por “ju”-në, gjatë komunikimit.
Ishte diçka që e kapi krejt gafil Zhejin, i cili më pas, gjatë përpjekjes së sforcuar për të dalë nga situata, pati dhe një gëk-mëk logjik, duke bërë disa lapsuse, gjithashtu logjike, si ngatërrimi i protokollit monarkik në lidhje me “ju”-në, trajtimi i “ju”-së vetëm si shumës tek përemrat vetorë, apo mbi faktin se kryeministra të tjerë nuk e kishin patur problem “ti”-në. Po ku, në ç’rast, pasi ky me Ramën, duhet të ketë qenë eksperienca e parë e Zhejit si moderator?!
Nga ana tjetër, episodi lidhet dhe me dy aspekte të tjera. Zheji futet ndër ata miq të dikurshëm të Ramës, që si ai, e ca të tjerë ku veçon Lubonja, i janë shndërruar në armiq në kushte politike. Dhe Rama, me gjasë ishte tek Zheji jo si nevojë për të sqaruar të vërtetat e tij në lidhje me shumë probleme të qeverisjes, por mbi të gjitha për t’u dhënë një mesazh, atij dhe të tjerëve si ai, ish-miq të dikurshëm, se sot nuk ka më arsye për t’i parë si të tillë.
“’T’i’-në jua lejoj njerëzve me të cilët kam kofidencë, ti nuk futesh tek ata”, i tha Rama atij me të cilin deri dje ndanin orët e trallisjeve rinore, e bukën gjithashtu, në shtëpinë e shoqi-shoqit. Dhe kjo besohet të ketë qenë i gjithë thelbi dhe arsyeja e zgjedhjes së Ramës për të shkuar tek Zheji, në një hapësirë debati pa pikë emri apo prestigji, siç Zheji e pamundëson, me mungesën ulëritëse të talentit, për të qenë edhe moderator. /tesheshi.com/
Ndiqeni videon e episodit:
