E kishte paralajmëruar si një konferencë ku do deklarohej diçka “e rëndësishme”, por kreu demokrat Basha, në një dalje para medias, krejt parashikueshëm, kërkoi dorëheqjen e kryeministrit Rama, ngacmuar nga fakti se Zaev e bëri të njëjtën gjë pas mos’hapjes së negociatave.
“Ështe koha qe qeveria te ndjekë shembullin e Maqedonisë së Veriut, të marrë përgjegjësinë për dështimet e saj dhe t’ia kthejë mandatin popullit shqiptar.
Me një qeveri të re legjitime që drejton procesin e negociatave, përparimi është i mundur”, tha Basha.
Sipas tij, ishte shumica e vendeve të BE-së ajo që nuk që dakort që Shqipërisë t’i hapeshin negociatat. “Shumica e vendeve ishin të një mendje se qeveria e Shqipërisë nuk e meritonte hapjen e negociatave.
Për këtë u artikuluan disa kushte që në thelb tregojnë se qeveria ka bërë hapa pas nga viti në vit”, theksoi Basha, pa iu referuar ndonjë dokumenti zyrtar apo ndonjë të dhëne zyrtare, lidhur me vendimarrjen europiane. /tesheshi.com/
