Aktori dhe politikani amerikan me origjinë austriake, Arnold Schwarzenegger, u ndalua të mërkurën në aeroportin e Mynihut për shkak se nuk kishte deklaruar një orë të shtrenjtë në doganë, njoftoi administrata doganore.
“Schwarzenegger mund të largohet ende nga Mynihu të mërkurën, por ora duhet të mbetet këtu,” tha Thomas Meister, një zëdhënës i doganave në aeroportin e Mynihut.
Sipas të njëjtave informacione, ndaj aktorit dhe ish-guvernatorit të Kalifornisë ka nisur procedimi penal për evazion fiskal.
“Schwarzenegger ishte i detyruar ta deklaronte dhe pastronte orën dhe tani duhet të mbetet në Bashkimin Evropian”, tha Meister.
Siç raporton e përditshmja Bild, Schwarzenegger synonte ta shiste orën e shtrenjtë të enjten në Kitzbuhel të Austrisë, në një ankand për të mirën e iniciativës për klimën, sponsor i së cilës ai është.
Sipas Bild, bëhet fjalë për një orë Audemars Piguet, vlerën e së cilës vetë Schwarzenegger e ka vlerësuar në 20,000 euro.
Sipas të përditshmes, Schwarzenegger u ankua për “ngacmime” nga zyrtarët doganorë. /tesheshi.com/
