Indrid Hoxha, një prej emrave që pranoi të mandatohej nga KQZ për deputet nga lista e PD-së, nuk ka pranuar të bëjë betimin. Për rrjedhojë, ka “djegur” mandatin, ku pra pak minuta prezencë në parlament i ka shfrytëzuar vetëm për këtë qëllim.
“Refuzoj që të marr mandatin e deputetit, qeveria ka kapur sistemin e drejtësisë. Refuzoj që të marrin mandatin, pasi këtu ka hetues dhe prokurorë të sistemit diktatorial. Refuzoj që të bëhem pjesë e parlamentit, pasi këtu ndodhen urdhëruesit e vrasjes së Azem Hajdarit. Refuzoj të marr mandatin, pasi i takon popullit”, tha ai, duke zgjedhur t’i bashkohet kauzës së daljes jashtë sistemit, ndërmarrë nga kupola demokrate.
Siç mund të vihet re, në fjalinë e fundit të mesazhit të tij politik, ai ka tentuar të bëjë dhe diversion, ku nën praninë e deputetes Rudina Hajdari, të bijës së Azemit që nuk pranoi dorëzimin e mandatit e që për më tepër udhëheq PD-në brendaparlamentare, Hoxha ka përmendur vrasjen e bujshme të ish-liderit të dhjetorit. Ndaj kësaj të papriture, kryeparlamentari Ruçi ka reaguar i qetë: “Është e drejta jote kushtetuese të mos bësh betimin, rrugë e mbarë suksese në jetë”. /tesheshi.com/
