Një zhvillim i (pa)pritshëm ka ndodhur në politikën shqiptare, më saktë në qeveri, ku ministri i Brendshëm Fatmir Xhafaj ka dhënë dorëheqjen. Kjo është njoftuar nga vetë kryeminsitri Rama në Twitter, ku njëherësh ka bërë me dije se cili do e zëvëndësojë.
“Pranova dorëheqjen e ministrit Xhafaj, të cilin e falenderoj për kontributin e çmuar. Gjeneral Sandër Lleshi do të sjellë një energji të re pozitive në krye të Punëve të Brendshme.Traseja është e shtruar. Tani duhet rritur shpejtësia dhe duhen arritur rezultate edhe më domethënëse”.
Kjo ngjarje vjen në një kohë tensioni politik, ku opozita e ka vënë Xhafajn, një prej figurave më me peshë në PS e qeverisje, njeriu që drejtoi reformën në drejtësi, në shënjestër të akuzave.
Duke përdorur kartën e të vëllait me një cen në biografinë penale, si i dënuar shumë vite më parë në Itali për trafik droge, opozita e futi dhe vetë ministrin te bandat e shpallura prej saj, duke shfytëzuar një audio-përgjim të dyshimtë, të njohur tashmë si çështja “Babale”.
Sandër Lleshi që do e zëvëndësojë, vjen nga radhët e ushtrisë shqiptare, ku emri i tij u përfol për herë të parë si kandidat për president në vitin 2012, propozuar nga shkrimtari Ismail Kadare. Më pas, Rama si kryeministër e morri si këshilltar të tij.
Sandër Lleshi deri më tani ka qëndruar jashtë partive e politikës aktive, duke preferuar vetëm pozicionin e shtetarit. /tesheshi.com/
