Një rast i paprecedent ka ndodhur së fundi ku nga llogorja e politikës është sulmuar një klerik, aq më tepër musliman, dhe kjo në prag të Ramazanit. Bëhet fjalë për kryeredaktorin e RD-së, Blendi Kasmi, i cili disa mesazhe të myftiut të Tiranës Ylli Gura, dhënë pikërisht para nisjes së Ramazanit, i ka përkthyer si qëndrime politike.
Kasmi nuk ka ngurruar të shkojë deri në ekstrem duke e quajtur Gurën si një vegël të Ramës e Ballës, referuar dhe origjinës së tij nga Librazhdi, pra të njëjtë me kreun deputetëve socialist.
“Ylli Gura, i cili shfaqet në media me urdhër të Ramë-Ballës sa herë kanë ndonjë hall politik, vesh petkun e fetarit si kryemyfti i Tiranës dhe lançon në media mesazhe që nuk kanë asnjë lidhje me besimin e njerëzve tek Zoti, por me besimin që ata duhet të kenë sipas këtij palo myftiu tek qeveria.
Mesazhi i dhënë prej tij pak orë më parë ishte se politika nuk duhet të prekë shenjtërinë e muajit të Ramazanit dhe se njerëzit nuk duhet të merren me politikë në këtë muaj. E kundërta është e vërtetë”, shprehet Kasmi në një shënim të gjatë, e po ashtu të mllefosur në Fb, duke marrë më pas qëndrime klerikale me etiketime e citime kuranore, edhe pse pa kompetencën e minimale në këtë fushë.
“Arsyeja që e kanë detyruar këtë klloun të qeverisë të bëjë një deklaratë të tilllë nuk ka asnjë lidhje me besimin dhe Zotin, që ai si hipokrit thotë se i shërben , por me hallin e qeverisë, ministri i Brendshëm i së cilës është kapur familjarisht në flagrancë droge. ‘Nuk ka dyshim, hipokritët janë ata të prishurit’, thuhet në librin e shenjtë të muslimanëve”, shprehet ndër të tjera Kasmi. /tesheshi.com/
