Sipas ndihmësve në komisionin e senatit amerikan për çështjet e jashtme, kandidatura e zonjës Kathleen Ann Kavalec, e emëruar si ambasadore e SHBA në Tiranë, i është kthyer të enjten Presidentit Donald Trump – raporton VOA.
E emëruar nga Trump në korrik 2018, që nga ajo kohë, kandidatura e saj ka qenë në pritje për t’u konfirmuar nga komisioni i senatit.
Siç raportohet nga Zëri i Amerikës, znj. Kavalec ishte parashikuar të dilte në një seancë në senat në muajin shtator, si pjesë e procesit të konfirmimit, por përfundimisht nuk dëshmoi dhe emri ishte hequr nga njoftimi për seancën.
Shkrimi i VOA-s për këtë rasti vijon duke informuar se një javë para seancës emri i saj ishte përmendur në një artikull të gazetës Ëashington Examiner që kishte të bënte me komunikimet e një zyrtari të Departamentit të Drejtësisë me ish-agjentin britanik Christophet Steele. Steele u dorëzoi agjencive amerikane të zbulimit një raport për lidhje të mundshme të fushatës Trump me rusët.
Emri i zonjës Kavalec ende figuron në faqen e Shtëpisë së Bardhë si e emëruar për postin.
Sipas rregullave të Senatit, kur koha e pritjes për konfirmim i kalon të 30 ditët, kandidatura i kthehet presidentit, por komisioni i senatit mund ta anashkalojë këtë rregull me një votë konsensuale.
Kandidatura e zonjës Kavalec ka qenë një prej rasteve me pritjen më të gjatë për konfirmim nga ato që i janë paraqitur komisionit të senatit.
Nuk është e qartë se përse komisioni i senatit nuk e ka marrë në shqyrtim kandidaturën – raporton VOA në shqip.
Kathlen Ann Kavalec do ishte gruaja zëvëndësuese e Donald Lu, një ambassador që la gjurmë në jetën politike shqiptare e jo vetëm, me protagonizmin e tij të ethshëm në shumë zhvillime shqiptare, ku veçohet reforma në drejtësi ku ai ishte investues i palodhur. Lu, e shprehu gjithë angazhimin e tij edhe me mësimin e shqipes, ku shumë mesazhe i përcillte dhe shqip, sidomos ato që kishin të bënin me detyrimin për të “zënë” të ashtuquajturit “peshq të mëdhenj”. Ikja e tij pason një boshllëk të dukshën në rolin amerikan në zhvillimet shqiptare. Edhe pse nuk kanë munguar deklaratat e dala nga selia e verdhë e Rrugës së Elbasanit, aty ku Uashingtoni ka përfaqësinë në Tiranë, mungesa e një zëri si ambasador ka qenë e dukshme.
Nëse znj. Kavalec do arrijë të ushtrojë detyrën e ambasadores së SHBA në Shqipëri, ajo do jetë e treta pas Mariza Linos dhe Marcy Rice. /tesheshi.com/
