Ka patur një përputhje imazhi marksist i Fakultetit të Shkencave Sociale, me praninë e atyshme, në mënyrë të paprecedent, të Albin Kurtit, kreut të VV-së, cili ka tentuar të karrikojë me frymë rebelizmi ata studentë e pedagogë të këtij fakuluteti, të cilët vijojnë protestën me ngujim e bojkot. E për ndryshim nga Juridiku, aty ka një emër konkret: është pedagogu Arlind Qorri, i konsideruar si marksist, i cili udhëheq betejën për shfuqizimin e Ligjit të Arsimit të Lartë. Javë më parë, një tjetër figurë e arsimit, Ermal Hasimja, do e cilësonte këtë fakultet si të pushtuar nga fryma e ideologjisë komuniste, ku sipas tij më shumë flitej për Leninin se sa për Fridmanin.
Dhe Albin Kurti është gjendur (jo)çuditërisht në këtë fakultet, duke bërë rolin e një emisari të ardhur nga Kosova, në fakt për një çështje ekstra të arsimit shqiptar, e kufizuar vetëm brenda terrenit universitar apo dhe politik shqiptar.
Ai ka tentuar të bëjë një lidhje frymëzuese mes protestës së tyre këto javë, e atyre që ai ka udhëhequr dikur kundër regjimit serb, ku edhe pse nuk asnjë ngjashmëri në raste e kontekst, e ka shfrytëzuar si adrenalinë në funksion të rebelimit.
“Fitoret edhe në politikë edhe në shoqëri vijnë nga qëndresa. Është e vërtetë që në aspektin e angazhimit tim politik kam filluar me protesta studentore. Në vitet ’90 në Kosovë ndodheshim në okupimin e Serbisë, e cila kishte hequr nga puna të gjithë shqiptarët. Universiteti i Prishtinës zhvillonte mësimet në shtëpi private, por në 1997 filluam protestat. Studentët kanë të drejtë, pothuajse cdo herë dhe cdo kund, por edhe kur mësimdhënësit janë me ata kanë më shumë të drejtë”.
E duke mos iu shmangur aspak motivit politik të kësaj pranie te Shkencat Sociale, ai e ka bërë të qartë synimin: një provokim të sedrës studentore për kauza politike.
Këtë e ka bërë duke ju kujtuar studentëve shqiptarë, atyre që së paku çdo kërkesë e kanë të përqëndruar te çështjet e arsimit, se ç’po ndodh në Kosovë.
“Serbia është e interesuar që ta ndajë Kosovën që të vijojë duke ndarë Bosnjën, ajo synon që të realizojë Serbinë e Madhe përmes ndarjes së fqinjëve. Kosova nuk ka as 5% serbë, ndërsa Serbia ka 20% pakica, por për Serbinë nuk flitet, por vetëm që të ndahet Kosova”, ka thënë Kurti.
Ai, si për t’ju imponuar lidership studentëve e pedagogëve te Shkencat Sociale, u tha se ai, forca që drejton, do ofrojë arsim falas nëse vjen në pushtet.
“Me qeverisjen e Vetëvendosjes nesër në Kosovë arsimi publik do të jetë falas. nuk mund të lejojmë që fëmijët dhe të rinjtë të kenë perspektivë të errët për shkak se nuk kishin mundësi në fillim të jetës së tyre”, deklaroi Albin Kurti.
Prania e kreut të VV-së mes studentëve e pedagogëve protestues te Shkencat Sociale, me tentativën e qartë për nxitjen e një rebelimi me tipare të majta në Tiranë e Prishtinë, është një zhvillim i paparashikuar, e që tregon për një axhendë të nëndheshme politike pas pafajshmërisë studentore në raport me kërkesat e tyre të tipit arsimor. /tesheshi.com/
