Tërmeti që tundi jugun e Japonisë la pas më së paku nëntë viktima dhe rreth një mijë të plagosur, përpos ndërtesave të shembura dhe rrugëve të shkatërruara.
Me magnitudë 6.4 ballë, tërmeti e pati epiqendrën mbrëmjen e së enjtes 11 kilometra në lindje të qytetit Kumamoto, me goditje të tjera që kanë pasuar deri të premten.
Mijëra banorë e çuan natën në qiell të hapur në Mashiki, pranë Kumamoto-s. Autoritetet thonë se shumë mund të kenë mbetur nën rrënoja. Më tepër se 44.000 njerëz u mbartën për në shkolla dhe në qendra të ndryshme komunitare.
Mbi 3.000 trupa janë dërguar për t’u ardhur në ndihmë banorëve, por operacionet e shpëtimit janë ndërprerë pas goditjeve shoqëruese të tërmetit të parë.
Ndërkaq, nuk ka të dhëna që tërmeti t’i ketë dëmtuar reaktorët bërthamorë që gjenden në ishull.
Një tërmet i dytë, dyzet minuta pas të parit, e pati magnitudën 5.7 ballë, kurse një tjetër akoma, pas mesnate, qe 6.4 ballë.
Në ca pjesë të territorit goditja qe po aq e fortë sa tërmeti shkatërrimtar i vitit 2011. /tesheshi.com/
