Presidenti i Asamblesë së Përgjithshme të Kombeve të Bashkuara, Tijani Muhammad-Bande, deklaroi se drejtuesit e shteteve anëtare nuk do të vijnë në New York në fund të shtatorit për mbledhjen vjetore, për herë të parë në historinë e kësaj organizate, për shkak të pandemisë së virusit koronar.
Sidoqoftë, ai theksoi se shpreson që në dy javët e ardhshme të shpallë mënyrën në të cilën presidentët e 193 vendeve do të mbajnë fjalime mbi temat e ndjeshme lokale dhe globale gjatë Debatit të Përgjithshëm, raporton AP.
Ardhja e liderëve botërorë në New York është shoqëruar gjithmonë me delegacione të mëdha, gjë që paraqet një rrezik në kushtet aktuale të pandemisë së virusit koronar.
Kjo situatë është një precedent në historinë e Asamblesë së Përgjithshme të KB, sepse për herë të parë në 74 vjet, seanca nuk do të mbahet në mënyrën e zakonshme.
Muajin e kaluar, Sekretari i Përgjithshëm i KB, Antonio Guterres rekomandoi që numri i njerëzve në seancë të zvogëlohej në mënyrë drastike.
Guterres sugjeroi që liderët botërorë të regjistrojnë mesazhet e tyre, dhe që vetëm ata diplomatë nga vendet anëtare të KB që jetojnë në New York të jenë të pranishëm drejtpërdrejt.
Muhamed-Bande tha se është e mundur që deri në fund të shtatorit, rreth 100 njerëz të lejohen të marrin pjesë në seancë.
Seanca e Asamblesë së Përgjithshme të KB zakonisht mbledh mijëra njerëz, zyrtarë qeveritarë, diplomatë dhe përfaqësues të shoqërisë civile, dhe këtë vit ai numër duhet të ishte edhe më i lartë, për shkak të festimit të 75-vjetorit të KB.
Muhamed-Bande theksoi se festimi i përvjetorit nuk ishte menduar si një ngjarje e vetme dhe do të vazhdonte gjatë gjithë vitit duke filluar në 26 qershor, kur u nënshkrua Karta e KB në San Francisko në 1945. /tesheshi.com/
