Një emigrant afrikan është raportuar se është mbytur në Kanalin e Madh në Venecia, ndërsa turistët dhe banorët po filmonin ngjarjen me celularët e tyre.
Një djalë i ri 22-vjeçar i quajtur Pateh Saba, nga Gambia, u hodh në ujë në mes të kanalit.
Të paktën tre jelekë shpëtimi u hodhën në ujë pranë të riut, ndërkohë që ai refuzoi të kapet për to, gjë që bëri disa të dyshojnë se ai donte të vetëmbytej.
“Asnjë nga të pranishmit nuk u hodh për të ndihmuar atë”, raporton Mirror.
Por pjesa e shëmtuar, veç asaj tragjike, nis më pas.
Autoritetet italiane kanë hapur një hetim, pasi nga videoja e incidentit që u shfaq në internet dëgjohen fyerjet raciste.
“Ai është budalla. Dëshiron të vdesë” , dëgjohet të thotë një person, ndërsa një tjetër dëgjohet duke i bërë thirrje që ai të kthehet në shtëpi.
Dëshmitarët në një moment fillojnë të qeshin, dhe njëri prej të pranishmëve thotë se ai duhet të lihet të vdesë.
Trupi i tij i pajetë më pas u nxorr nga uji.
Një shofer taksie u tha mediave lokale se i riu u hodh në ujë dhe më pas atij ju ofruan disa jelekë shpëtimi, por ai refuzoi ndihmën.
“Ai ishte i dëshpëruar. Unë nuk e di se çfarë mund të jetë historia e tij. Ata thanë se është nga Afrika. Kushedi se çfarë ka hequr, sa detet dhe sa shkretëtira ka kaluar për të ardhur deri këtu? Dhe ka ardhur të vdesë në qytetin më të bukur në botë”, komentoi shoferi i taksisë.
Më poshtë mund të shihni videon:
