Zëvendëskryeministrja e Serbisë, Zorana Mihajloviç deklaroi se ministri i Jashtëm i Rusisë, Sergej Lavrov, po abuzon me faktin se Serbia nuk ka vendosur sanksione ndaj Rusisë, duke u përpjekur të tregojë se Serbia mbështet sulmin e Rusisë ndaj Ukrainës, edhe pse Serbia ka vendosur qartë kundër këtij konflikti duke votuar për rezolutën e OKB-së, e cila dënon luftën.
“Serbia ka vendosur qartë kundër luftës në Ukrainë, dhe me faktin që ne nuk vendosëm sanksione ndaj Rusisë, siç bëri e gjithë Evropa, tregon se ajo udhëhiqet nga një politikë të pavarur”, tha Mihajloviç.
“Në vend që të respektojë vendimin tonë për të mos vendosur sanksione, pavarësisht presioneve me të cilat po ballafaqohemi, Lavrov po e keqpërdor këtë fakt duke e paraqitur si mbështetjen tonë për palën ruse në konflikt, duke ushtruar kështu presion shtesë ndaj Presidentit Aleksandar Vuçiç dhe qeverisë së Serbisë. Edhe pse flet për miqësinë mes dy vendeve, kjo lloj sjelljeje në veprim tregon të kundërtën”.
Ajo theksoi se Serbia zhvillon një politikë të pavarur ekskluzivisht në interes të qytetarëve të saj.
“Politika e Qeverisë dhe Presidentit është ruajtja e paqes dhe stabilitetit, bashkëpunimi rajonal dhe anëtarësimi në BE. Gjithçka që nuk kontribuon në këto qëllime, përfshirë edhe atë që thotë zoti Aleksandar Vulin, nuk ka të bëjë me këtë politikë”, tha Mihajloviç. /tesheshi.com/
