Është e vështirë të gëlltitet se si një drejtor shkolle më emër, ajo e muzikës “Jan Kukuzeli” në Durrës, kërkohet tashmë nga Policia nën akuzën e përfshirjes në afera narkotikësh.
Ai është Dashamir Mehmeti, 41 vjeç.
Emri i tij rezulton në një listë policore lidhur me një operacion që u finalizua mëngjesin e kësaj të diele.
Më saktë, pas dy muaj hetime, Policia e Durrësit ka zbuluar arsenal armësh, ndërsa janë sekuestruar qindra doza kanabisi, kokaine dhe heroine. Operacioni i koduar ‘Summer’ ka çuar në pranga 15 persona, tre të tjerë janë shpallur në kërkim dhe katër janë vënë në hetim.
Dhe një prej personave që është shpallur në kërkim ështëm dhe drejtori i shkollës së muzikës “Jan Kukuzeli”.
Raportohet se Policia ka dokumentuar përfshirjen e tij, pasi ka organizuar një blerje të simuluar. Konkretisht, Mehmeti ka rënë në kurthin e ngritur nga blutë e Durrësit, duke i shitur një agjenti drogë.
“Theksojmë se gjatë hetimeve proaktive mbi bazën e autorizimeve të lëshuara nga Prokurori i çështjes, janë bërë shumë blerjeve të simuluara personave të ndryshëm, të dokumentuara këto me pamje filmike, me dron, përgjime ambientale dhe sekuestrime të lëndës narkotike”, njofton policia.
Pra, e keqja e madhe ka depërtuar dhe në persona me një lloj statusi shoqëror, ku vështirë të arsyetohet se si një drejtor shkolle është molepsur me aspekte të rënda kriminale. /tesheshi.com/
