Dy dekada më parë ajo ishte një emër i njohur i zhvillimeve në arenën ndërkombëtare. Fjala është për ish-Komisioneren e Lartë të Kombeve të Bashkuara për Refugjatët, Sadako Ogata, e cila është shuar në moshën 92-vjeçare. Lajmi i bë i ditur nga transmetuesi publik japonez NHK, pa specifikuar shkakun e vdekjes.
Sadako Ogata e ushtroi misionin e saj në kohën e gjenocidit të Ruandës dhe luftërave në ish-Jugosllavi në vitet 1990, ku pati dhe një takim me Millosheviçin. Ajo la dhe një precedent të diskutueshëm at’botë, bllokimin e ndihmave për në Sarajevë, duke arsyetuar se palët ndërluftuese abuzojnë me to.
Sadako Ogata fitoi një doktoratë në shkencat politike nga Universiteti i Kalifornisë, Berkeley, dhe më vonë shërbeu si Përfaqësues Special i Japonisë për Restaurimin e Afganistanit.
Agjensia e Lajmeve Kyodo raportoi se Sadako Ogata vdiq javën e kaluar, të martën, por Reuters nuk ka qenë në gjendje të kontaktojë familjen e saj ose përfaqësues të tjerë që mund ta konfirmonin informacionin.
Në një intervistë të 2015 për Reuters, Sadako Ogata i bëri thirrje Japonisë për një angazhim më të madh në çështjen e refugjatëve.
“Japonia duhet të përgatisë kushtet për të mirëpritur njerëzit – jo t’i mirëpresë të gjithë, por ata që kanë nevojë, që kanë nevojë serioze dhe që duan të vijnë, ose dëshirojnë të vijnë”, tha ajo.
“Unë mendoj se duhet të jemi të hapur për t’i futur ato”, shtoi ajo.
Japonia, ku shumë janë krenarë për homogjenitetin kulturor dhe etnik, pranoi vetëm 42 refugjatë vitin e kaluar, nga më shumë se 10,000 kërkesa.
“Nëse do të kishte miliona refugjatë, do të ishte ndryshe, por niveli i mbërritjes nuk është aq i lartë dhe është marrëzi të thuash që Japonia nuk ka burime”, tha e ndjera ne lidhje me rastin. /tesheshi.com/
