Është ndarë nga jeta në moshën 80-vjeçare, ish-kreu i Komunitetit Musliman Shqiptar, Selim Muça. Njoftimi për vdekjen e tij është dhënë duke i paraprirë me frazën klasike të një besimtari musliman për largimin e dikujt në këtë jetë huazuar nga një thënie e profetit Muhamed, të “Zotit jemi dhe te Zoti do të kthehemi…”.
“Sot është nisur për në udhën e pafundme, një prej drejtuesve më të spikatur të myslimanëve shqiptarë, Haxhi Selim Muça. Ai ndërroi jetë në shtëpinë e tij në Tiranë, në moshën 80-vjeçare, pas një sëmundjeje të rëndë, prej së cilës vuante prej kohësh. Haxhi Selim Muça do të mbahet mend si drejtuesi që e reformoi KMSH-në dhe punoi shumë për Bashkësinë Islame Shqiptare. Ai ndërmori hapa konkretë për institucionalizimin e punës së KMSH-së në mbarë vendin dhe për gjallërimin e jetës shpirtërore të besimtarëve myslimanë. Gjithashtu ai do të kujtohet e vlerësohet për frymën e tij përherë pozitive dhe prioritetin që i jepte dialogut, bashkëpunimit dhe bashkëjetesës ndërfetare në Shqipëri, por edhe në të gjitha hapësirat e banuara nga shqiptarët në Ballkan”, shkruhet në faqen zyrtare të KMSH-së.
Selim Muça pasoi në postin e lartë të KMSH-së të parin kryetar të saj pas ’90-ës, Sabri Koçin, pasi ky i fundit ndërroi jetë. Ai do qëndronte për gati 10 vjet në krye të institucionit më të lartë të muslimanëve shqiptarë, derisa për arsye moshe u zëvëndësua nga ai që sot është kryetari aktual, Skënder Bruçaj.
Selim Muça, një dibran, ish-qytetar i Peshkopisë, u riaktivizua në jetën islame pas rilejimit të besimit fetar. Një ish-medresist i brezit të fundit para ndalimit të ushtrimit të besimit, ai do studionte më pas për Inxhinieri në Çeki, duke e ushtruar këtë profesion në disa ndërmarrje të qytetit të Peshkopisë.
Të tre fëmijët e tij që ka lënë pas janë emra të njohur në fushat përkatëse: Arjan Muça, ish-shefi i Krimeve në Drejtorinë e Policisë Tiranë, një kuadër i njohur policor; Alma Muça, gjykatëse e njohur; si dhe Ermal Muça, ish-konsull në Stamboll. /tesheshi.com/
