Presidenti Bujar Nishani e ka shprehur hapur mospëlqimin e tij ndaj kryeprokurorit Adriatik Llalla, kur tha se:
“Nuk e propozon Presidenti shkarkimin, nuk e ka si kompetencë. Nëse do t’i jepej si kompetencë Presidentit të Republikës pa dyshim do ta shikoja dhe në këtë aspekt që – A mundet që një Prokuror i Përgjithshëm, në gjykimin e Presidentit, ta vazhdojë të jetë me këtë performancë?”, iu shpreh kreu i shtetit Babaramos në “5 pyetjet” e tij.
Sinjali i parë u dha kur presidenti nuk dekretoi prokurorët e Task-Forcës antikorrupsion, emëruar së fundmi nga Llalla; pikërisht ata që i përkasin atij ekipi akuzatorësh, prej të cilëve politikanë të niveleve të larta rrezikojnë të përfundojnë në pranga.
Por kjo mund të hapë një lojë të rrezikshme, pasi Task-Forca në fjalë ka bekimin e Uashingtonit për të vepruar. Ky qëndrim i Nishanit ndaj Llallës, e vë për herë të parë kryeprokurorin në shenjestër të politikës, ngjashëm si paraardhësit e tij; e nëse presidenti gjykohet në këtë rast politikisht si demokrat, kjo është e disata herë që forca politike që emëron kryeprokurorin, po ajo e heq më pas.
Arsyet, edhe pse mbeten mister, janë gjithsesi të kuptueshme.
/tesheshi.com/
