Pas kryeministrit Haradinaj edhe ministri i Forcës së Sigurisë së Kosovës, Rrustem Berisha ka shprehur shqetësimin për largimin e pjesëtarëve serbë nga FSK-ja.
Berisha në një konferencë për media, ka thënë janë mbi 40 pjesëtarë të forcës nga komuniteti serb, të cilët kanë bërë kërkesë që të largohen nga FSK nga 137 sa janë, megjithatë shtoi se rruga e FSK-së nuk do të ndalet.
“Nuk bëhet fjalë për raste individuale por bëhet fjalë për raste grupore dhe që numri e tejkalon 40-shin. Ministria vlerëson se këto kërkesa për largim vinë si pasojë e sulmeve të qëllimshme që i janë bërë FSK-së, përkatësisht pjesëtarëve të komunitetit serb dhe janë tentim për të dëmtuar progresin, të arriturat e FSK-së, si dhe imazhin e saj si institucioni më i besueshëm në vend. Ne vërtet ndjejmë keqardhje për pjesëtarët tanë të cilët nuk janë lejuar të vendosin lirshëm për të ardhmen e tyre, për karrierën e tyre profesionale, duke ndikuar në mirëqenie e tyre dhe familjarëve të tyre”, tha Berisha.
Ai shtoi se pjesëtarët FSK-së nga komunitetit serb kanë qenë shumë mirë të integruar në kuadër të strukturës së FSK-së dhe kanë qenë në nivel të përgjegjësive dhe detyrave të tyre.
“Shantazhet dhe kërcënimet e bëra janë të papranueshme dhe shkelje e të drejtave themelore të njeriut… Rruga e Kosovës dhe e FSK-së nuk do të ndalet. FSK ka qenë , është dhe do të jetë e hapur për të gjitha komunitetet që jetojnë në Kosovë”, tha ai.
Ai tha se nga 137 pjesëtarët të komunitetit serb, sa janë në FSK-së, mbi 40 janë larguar. /tesheshi.com/
