Nga Blendi Gashi
Dyshja Kadri Veseli e Ramush Haradinaj të enjten në seancën konstituive nuk përjashtohet që shpëtimin ta kërkojnë përmes votimit të fshehtë që të sigurojnë 61 vota për zgjedhjen e kryekuvendarit dhe t’i hapet rrugë formimit të qeverisë, edhe pse praktikat e deritanishme kanë qenë me votim të hapur.
Megjithatë për të realizuar votim të fshehtë, fillimisht duhet të ketë një propozim nga njëri prej grupeve parlamentare, dhe më pas të hidhet në votim ky propozim i cili kërkon shumicën e votave të deputetëve të pranishëm.
Qëllimet prapa këtij propozimi bëhet me qëllim të zvogëlohet presioni eventual që mund të bëhet ndaj deputetëve të krahut tjetër, konkretisht të koalicionit LDK-AKR-Alternativa ku deputet të caktuar kanë parlajmëruar votën “pro” kandidatit të PAN-it për kryeparlamentar.
Portali ynë ka tentuar të marrë një përgjigje nga koalicioni PAN nëse do tentojnë të zgjedhin kryekuvendarin përmes votimit të fshehtë por ka qenë i pamundur kontakti me ta.
Se mund të ketë përpjekje nga PAN-i që votimi i kryeparlamentarit të zhvillohet në mënyrë të fshehtë kanë thënë edhe përfaqësues të Lëvizjes Vetëvendosje dhe të koalicionit LDK-AKR-Alternativa.
Përfaqësues të këtyre partive bëjnë të qartë se nëse PAN tenton të vije në pushtet përmes votës së fshehtë do të kenë kundërpërgjigjen e tyre, pra do të bojkotojnë seancën dhe do t’ia pamundësojnë kuorumin.
Deputetja e LDK-së Vjosa Osmani thotë se një metodë e tillë nuk është praktikuar asnjëherë në pesë legjislaturat e kaluara, andaj nuk ka asnjë arsye të ndodh kjo edhe këtë legjislaturë, pra të fshehet vullneti i deputetëve.
“Ne si deputet të koalicionit LDK-AKR-Alternativa jemi të vendimit që duhet të shkohet në votim të hapur. Nëse koalicioni PAN tenton të bëjë votim të fshehtë natyrisht se kërkohet që për një metodë të tillë të votohet në Kuvend. Natyrisht se ne jemi duke shqyrtuar nëse do ta prishim kuorumin në atë moment apo do të qëndrojmë në sallë por ende nuk ka një vendim përfundimtarë sepse metodat e tilla s’janë propozuar kurrë deri sot për kryeparlamentarit apo qeverisë. Natyrisht se nuk do të rrijmë duarkryq dhe do tëgjejmë metodën për ta bllokuar një gjë të tillë”, thotë Osmani për tesheshi.com.
Ajo tregon se një prej metodave që po e shqyrtojmë është që ta prishin kuorumin bashkë me Vetëvendosje-n.
“Nëse ne dhe VV largohemi nga salla nuk do kenë kuorumin e nevojshëm që të hyjnë në proces të votimit të fshehtë”, thotë Osmani.
Deputetja e Vetëvendosje-s, Donika Kadaj-Bujupi, thotë se PAN nuk mund të marrë vendim që të shkohet me votim të fshehtë.
“PAN as me vendos për votim të fshehtë siç nuk i ka as për kryeparlamentar e qeveri”, thotë Kadaj-Bujupi për tesheshi.com, ndërsa nuk tregon nëse do braktisin seancën nëse tentohet votimi i fshehtë.
Kujtojmë se rregullorja e punës së Kuvendit thotë se parlamentari zgjidhet me shumicën e votave të deputetëve të Kuvendit, ndërsa nuk e cek mënyrën e votimit. /tesheshi.com/
