Kryeministri Rama konfirmoi faktin se në Ballkan mund të aktivizohet një industri ushtarake për të mbështetur Ukrainën, siç e kërkoi një ditë më parë presidenti Zelensky
“Propozimi i Zelenskyt nuk ka asgjë të jashtëzakonshme, Zelensky na foli për mundësinë e bashkëpunimit që do të thotë investimi, prodhimi dhe bashkëpunimi. Të gjithë thanë po, jo vetëm Shqipëria. Ky është një proces, e dimë që duhet të investojmë më shumë në mbrojtje si çdo kush tjetër dhe gjitha që mund të bëjmë në këtë drejtim do ta bëjmë. Do ta bëjmë këtë me aleatët tanë dhe jo me të tjerët”, tha Rama në konferencën për shtyp me komisionierin Varhelyi pas samitit BE-Ballkani Perëndimor.
Kjo ka bërë që nga Poliçani të ngrihen pretendimet për rikthimin në punë të Uzinës së atjeshme të të Armatimit, të asaj të kohës së komunizmit.
Kryebashkiaku i atyshëm Adriatik Zotkaj, i cili vite më parë ka punuar vetë në ish-Uzinë, tha se janë të gatshëm t’i prodhojnë që sot municionet.
“Mua më bëhet qejfi që u kujtuan për Poliçanin dhe duhej të vihej tek lufta, pasi ne kemi bërë dhjetëra kërkesa për Ministrinë e Mbrojtjes, për ta vënë në punë ish-Kombinatin mekanik, dhe përgjigja e tyre ishte s’kemi projekt. Ne kemi qenë të gatshëm si pushtet vendor për ta vënë në punë për të prodhuar fishekë për policinë, ushtrinë dhe poligonet e qitjes. Me gjithë dashamirësinë e Ramës, kërkesa jonë ka ndeshur në burokracitë e mëdha të Ministrisë së Mbrojtjes, gjithmonë kanë vënë sterkëmbësha dhe nuk kanë qenë dashamirës ndaj nesh.
Sot jemi në situatë tjetër. Lufta në Ukrainë, me çfarë po shohim ka ardhur frontale, ndaj kjo i përgjigjet drejtpërdrejt nevojës për prodhimin e municioneve në Poliçan, që nga predhat e deri tek fisheku 7 mm, 9mm dhe 12.7 mm dhe që mund t’i prodhojë sërish kombinati sepse i ka kapacitetet. Ne jemi të gatshëm t’i prodhojmë që sot”, tha Zotkaj. /tesheshi.com/
