Një rast i veçantë, një vendim gjykate në Firence ka marrë dhenë në median italiane, duke e konsideruar një precedent që tregon se e keqja ka marrë revansh institucionalisht.
E përditshmja italiane “La Nazione”, më e madhja në rajonin e Toskanës dhe qytetin e Firences, bën të ditur se një gjykatëse në “kryeqendrën e kulturës” italiane, ka marrë një vendim për të liruar dhe shpallur të pafajshëm një 42 vjeçar, të cilit policia i ka kapur gjysmë kilogrami kokainë të pastër.
Shpjegimi i vendimit: “Është i pasur, ka mundësi ta blejë dhe është thjesht ves, nuk e tregton”.
“La Nazione” e cila tregohet me etikë dhe nuk e përmend emrin e biznesmenit thekson se ai u arrestua për posedim të 471 gram koainë, por gjyqtarja Paola Pelsito, ka shkruar në vendimin finale që “nga faktet e hetuara del që burri vjen nga familje me gjendje të mirë, është djalë i vetëm dhe ka mundësi ta blejë dhe të vetmin ves që ka është përdorimi jashtë masës i drogës”. Dhe si përfundim e dënon me vetëm 60 mijë euro gjobë. Prokurori i Përgjithshëm e ka apeluar menjëherë vendimin i tronditur nga dispozitivi i marrë nga gjyqtarja Belsito.
“Një sentencë e bukur, mund të bëjë shkollë në drejtësi”, komenton avokati Emilio Betini.
“I pandehuri nuk kishte as peshore as artikuj përzierje, pra nuk e shpërndan, thjesht e përdor.
Por transfertat e tij postare me çeqe që arrijnë shumën deri në 400 mijë euro?!
Përgjigja e avokatit nuk vonon: “Ia kanë dhënë familjarët, e duan shumë”.
Babai i ish-të pandehurit tashmë të shfajësuar thekson se të gjithë këto para vijnë nga trashëgimia e prindërve dhe gjyshërve.
Por vendimi i gjykatës nuk mbaron me kaq: “Nuk ka varësi është më shumë nevojë psikologjike”.
Ky vendim gjykate në një farë mënyrë është fenomen i një morali që shteti dhe shoqëria po komandon thuajse në të gjithë Europën ku ne jetojmë.
Pra janë braktisur jo dalëngadalë por totalisht gjithçka ka qenë flamur moral i një shoqërie: Familja, morali, nderi dhe puna. Gjithçka që futet në antivlerën e shoqërive konsumiste po shiten edhe si “kulturë shoqërore”.
Pra kultura e të pasurit që mund të bëjë gjithçka, pa i hyrë gjemb në këmbë se i ka mundësitë dhe që ka të drejta më shumë se ai që nuk ka ose konsiderohet “shtresë e ulët”. Një padrejtësi që është legalizuar me një vendim gjykate që bëhet precedent i një shoqërie që konsiderohet e drejtë…
Përgatiti: Y.Pata- /tesheshi.com/
