Ndërkohë që në Francë po afrohen gjithnjë e më shumë zgjedhjet presidenciale që pritet të mbahen në prill dhe maj të këtij viti, në këtë vend po zhvillohen debate mbi “të kaluarën e korruptuar” të kandidatit republikan, Francois Fillon dhe kandidates franceze të ekstremit të djathtë nga Partia e Frontit Kombëtar, Marine Le Pen, njofton Agjencia Anadolu.
Sipas informatave deri te të cilat ka ardhur gazetari i AA, përveç kandidatëve presidencialë Fillon dhe Le Pen, shumë politikanë tjerë francezë kanë qenë po ashtu të lidhur me skandale të korrupsionit, përfshirë ish-presidentët Zhak Shirak dhe Nicolas Sarkozy.
Ish-presidenti Shirak, i cili në periudhën midis viteve 1977 dhe 1995, gjatë kohës sa ka shërbyer si kryebashkiak i Parisit, u akuzua se u kishte ndarë anëtarëve të partisë së tij nga një rrogë, edhe pse nuk ishin të punësuar.
Gjykata në Paris në fund të vitit 2011, e gjeti fajtor për korrupsion dhe e dënoi me burg me kusht në kohëzgjatje prej dy vitesh. Po flasim për një proces të rëndësishëm gjyqësor, duke pasur parasysh se Shirak ishte presidenti i parë i vendit ndaj të cilit është ngritur aktakuzë pas Luftës së Dytë Botërore në Francë.
Ish-presidenti i vendit Nicolas Sarkozy, për shkak të aktiviteteve të paligjshme gjatë fushatës zgjedhore në vitin 2012 gjithashtu do të përballej me gjykatë.
Ai ngarkohej me akuzën se aktivitetet e tij dhe shpenzimet financiare gjatë fushatës janë prezantuar si aktivitet i partisë politike, dhe se ka tejkaluar kufirin ligjor prej 22.5 milionë euro.
Ministri i Jashtëm aktual, Jean-Marc Ayrault dhe ish-kryeministër i vendit, gjatë kohës sa kishte qenë në krye të qytetit të Nantes, u shpall fajtor ngase përmes një OJQ-je ia kishte besuar shtypjen e gazetës lokale në Nantes një kompanie pa shpallje të tenderit. Ai u dënua me gjashtë muaj me kusht dhe një gjobë prej 30.000 franga (5,900 euro).
Ish-ministri francez i financave Jerome Cahuzac, vitin e kaluar u dënua me tre vjet burg ndërkohë që atij iu ndalua edhe kandidimi në zgjedhje për pesë vitet e ardhshme, për shkak të llogarive sekrete bankare në Zvicër dhe evazionit fiskal.
Kur bëhet fjalë për kandidatin në zgjedhjet presidenciale të këtij viti Francois Fillon, gazeta franceze “Le Canard Enchaine” ka njoftuar se gruaja e tij Penelope Fillon është angazhuar si një konsulent, dhe në këtë funksion ajo ka realizuar fitime të paligjshme.
Gazetat gjithashtu pohojnë se Penelope Fillon në letër ishte këshilltare e politikanit francez Marc Joulaud, dhe se në tetë vitet e fundit në mënyrë të paligjshme ka realizuar një fitim prej gjysmë milion euro.
Për më tepër, janë paraqitur edhe pretendimet ndaj dy fëmijëve të Fillon-it se në Senat gjatë dy viteve “kanë shërbyer si konsulent”, dhe se ata janë paguar 84.000 euro.
Në të thuhet gjithashtu se Penelope Fillon ka marrë nga Parlamenti francez 45.000 euro dëmshpërblim për shkak të statusit të personit të papunë.
Sa i përket kandidates ekstreme të krahut të djathtë nga Partia e Frontit Kombëtar Marine Le Pen, në muajin e fundit emri i saj është lidhur me skandalin në Parlamentin Evropian.
Zyra Evropiane për Luftën kundër Korrupsionit (OLAF) ka publikuar dokumente ku thuhet se Le Pen-i në periudhën midis 2010 dhe 2016 i ka paguar asistentëve të saj në Parlamentin Evropian shumën prej 340.000 euro. Parlamenti Europian më pas i kërkoi udhëheqëses së partisë së krahut të djathtë Marine Le Pen që t’i kthejë këto para mbrapa.
Pashtu është njoftuar se Thierry Légier në PE ka marrë një pagë si konsulent i Le Pen-it, ndërkohë që në fakt ky njeri është përgjegjës për sigurinë e politikanes franceze.
Parlamenti Evropian pret që deri në fund të shkurtit t’i kthehen 41,500 euro, të cilat i janë paguar Legiere-s. /tesheshi.com/
