Në një prononcim për Zërin e Amerikës, gruaja në krye të dosjeve të ish-regjimit, Gentiana Sula, e mbrojti vendimin e institucionit të saj mbi të kaluarën e prokurorit Bujar Sheshi në komunizëm. Ai vërtet ka qenë ish-bashkëpunëtor i Sigurimit të Shtetit.
“Bëhet fjalë për një person, i cili nuk mund të jetë pjesë e institucioneve të drejtësisë së demokracisë për shkak të bashkëpunimit të tij me Sigurimin e Shtetit gjatë diktaturës. Por është e drejta e tij të ankohet në prokurori”, tha znj. Sula, drejtoreshë e Autoritetit për Informim mbi Dokumentat e ish Sigurimit të Shteti.
Paraditen e kësaj të marte, anëtari i Këshillit të Lartë të Prokurorisë ngriti një padi ndaj Autoritetit të Dosjeve, duke pretenduar se aty ka një fallsikim, e më tej akoma se ndaj tij po ka një sulm me prapavijë politike, me qëllim deligjitimimin e vettingut e përgjithësisht të Reformës në Drejtësi.
“Skenari nuk synon thjesht vetëm goditjen e personit tim si hakmarrje për çështjet që kam hetuar apo përfaqësuar si prokuror, apo për mendimet që kam shfaqur si anëtar i KLP-së për kriteret që duhet të plotësojnë kandidatët për Prokuror i Përgjithshëm, por mendoj se synohet goditja dhe vendosja nën trysni e të gjithë institucionit të KLP-së, pasi kemi ardhur në një moment përfundimtar të krijimit të SPAK-ut dhe përzgjedhjes së Prokurorit të Përgjithshëm”, u shpreh ai.
“Deklaroj me përgjegjësi të plotë para jush dhe para ligjit nuk kam qenë asnjëherë bashkëpunëtor i fshehtë i ish Sigurimit të Shtetit shqiptar”, u shpreh prokurori Sheshi në mbledhjen e KLP-së, cituar nga VOA.
Ndërsa znj.Sula hodhi poshtë si të pavërteta këto pretendime, duke garantuar për ndershmëri profesionale në punën e saj dhe të institucionit që përfaqson. /tesheshi.com/
