Në avokatinë që Rama u bëri krerëve të UÇK-së në politikë, më saktë treshes Thaçi-Haradinaj-Veseli, e kjo për shkak të aktakuzës së beftë të Speciales ndaj Thaçit, ai veçoi rastin e Haradinajt, kampion i përballjes ndër vite më gjykatat ndërkombëtare.
Por siç dihet, mes të dyve ka një çarje të thellë vitet e fundit. Haradinaj në jo pak herë e ka sulmuar ashpër Ramën, e ky i fundit, referuar akuzave që janë bërë nga ish-homologu kosovar, ka vendosur dhe ta hedhë në gjyq.
Ndërsa në fjalimin e kësaj të enjteje në parlament, zgjodhi ta nominojë Haradinajn si një simbol lufte dhe pastërtie në raport me akuzat.
“Ramush Haradinaj la detyrën e kryeministrit në vitin 2005, pikërisht për t’iu përgjigjur thirrjes për akuza për krime të Tribunalit të Hagës dhe dy herë doli i pafajshëm dhe për herë të parë në historinë e Tribunalit të Hagës ndodhi që një person i shpallur i pafajshëm të shpallet në rigjykim pas apelimit, përkundër faktit që vite e vite me radhë prokuroria nuk gjeti fakte.
Një i pafajshëm që 10 vite i jetoi me hijen e një persekutimi në kuptimin m të drejtë të fjalës, persekutim sepse dal i pafajshëm më thërret prapë, nuk provon asgjë dhe prapë më paragjykon.
Padyshim komandant në një nga zonat më të ashpra të luftës, ish-kryeministër i zvarritur një dekadë për të dëshmuar që është pa lidhje me krimet kundër njerëzimit po thjesht ka udhëhequr një luftë, jo një marshim paqeje, ka humbur njerëz madje, ndërkohë që askush nuk merr asnjë përgjegjësi, fare, për gjithë këtë jetë të sakatuar, askush”, tha Rama. /tesheshi.com/
