Jo drejtpërdrejt por tërthorazi, kreu demokrat Basha ka vijuar në të tijën duke injoruar letrat e shefit të qeverisë me ftesën për dialog. Në një mesazh të fundit, ai, duke iu gëzuar faktit të fitores të djathtëve në zgjedhjet europiane, thotë se beteja për votën nuk do ndalet.
“Qytetarët europianë, me pjesmarrjen më masive të 20 viteve të fundit në zgjedhjet për Parlamentin Europian, konfirmuan vendosmërinë për të mbrojtur dhe çuar përpara vlerat europiane.
Jam i lumtur që familja jonë politike EPP – European People’s Party është konfirmuar forca e parë në parlamentin dhe qeverisjen europiane. Urimet më të përzemërta për presidentin Joseph Daul dhe PPE dhe në veçanti për fushatën e jashtëzakonshme të kandidatit tonë për President të Komisionit Europian, Manfred Weber.
Forca e qytetarëve në demokraci është vota, prandaj beteja e shqiptarëve për votën e lirë është betejë jetike për vlerat europiane, për demokracinë perëndimore dhe për Shqipërinë si gjithë Europa.
Asnjë hap pas!“, shkruan Basha. /tesheshi.com/
