Në Shqipëri, me të rinj të harbuar në timon, të kalosh në vijat e bardha nën siguri për jetën, është ndër veprimet më të pasigurta. Orë më parë, një e re në Tiranë, Merita Feracaku, mbylli sytë përgjithnjë pasi u godit nga një automjet teksa kalonte në pjesën e saj ekskluzive, vijat e bardha.
Ajo luftoi për jetën në pak ditë në spital, pa ia dalë dot.
Për rastin, njoftimi policor thotë:
“Në lidhje me një lajm të publikuar në portale, i cili bën fjalë për një aksident të ndodhur në lagjen ‘Ali Demi’, ju informojmë se:
Më datë 15.01.2024, në orën 01:30, është bërë arrestimi i shtetasit R. A., 22 vjeç, banues në Tiranë, për veprën penale ‘Shkelja e rregullave të qarkullimit rrugor’ dhe materialet i kanë kaluar për veprime të mëtejshme procedurale, Prokurorisë pranë Gjykatës së Shkallës së Parë të Juridiksionit të Përgjithshëm Tiranë.
Ky shtetas, më datë 14.01.2024, rreth orës 23:00, në lagjen ‘Ali Demi’, në afërsi të shkollës ‘Kushtrimi i Lirisë’, (në drejtim të Shkozës), në vendkalimin e këmbësorëve, ka aksidentuar shtetasen M. F., 36 vjeçe, banuese në Tiranë, e cila si pasojë e aksidentit është dëmtuar dhe është dërguar në spital për ndihmë mjekësore.
Gjatë kontrollit të dokumentacionit të automjetit tip ‘Skoda’, që drejtonte shtetasi R. A., nuk janë konstatuar mangësi, si dhe pas kryerjes së testit të alkoolit ka rezultuar se drejtuesi i automjetit, nuk kishte konsumuar alkool.
Mbrëmjen e sotme, si pasojë e dëmtimeve të marra nga aksidenti, shtetasja M. F., ka ndërruar jetë.
Policia po vazhdon kryerjen e veprimeve të mëtejshme procedural”.
E ndjera po kthehej nga puna kur u godit nga makina mbi vijat e bardha. Dhe ky nuk është i pari rast që kalimtarët e pësojnë, në vija të bardha apo në trotuare, prej atyre që janë në timon, pothuajse gjithëherë të rinj. /tesheshi.com/
