E shkarkuara më e fundit nga Vettingu është gjyqtarja Marsela Balili. Siç informon TCH, ajo ishte caktuar përkohësisht si pjesë e SPAK-ut, por kjo karrierë i pritet në mes.
Marsela Balili e nisi karrierën në sistemin e drejtësisë në vitin 1999 si gjyqtare në Gjykatën e Vlorës dhe, në vitin 2004 u emërua gjyqtare në te Krimet e Rënda në Tiranë, detyrë të cilën e mbajti deri në vitin 2009.
Dhe po atë vit, karriera e saj morri një kthesë pasi me vendim të ish-Këshillit të Lartë të Drejtësisë iu hoq imuniteti dhe u pezullua nga detyra në vitin 2009. Ndodhi kjo teksa Prokuroria nisi një procedim penal ndaj saj dhe bashkëshortit prokuror, Aleksandër Plepi me akuzën e korrupsionit.
Në fund të procesit, Balili u shpall e pafajshme ndërsa bashkëshorti i saj u dënua me 1 vit burg. Marsela Balili u rikthye në sistemin e drejtësisë me vendim të Këshillit të Lartë të Drejtësisë në vitin 2017 si gjyqtare në Gjykatën e Krimeve të Rënda. Pas shkrirjes së kësaj gjykate, ajo u caktua përkohësisht anëtare e Gjykatës së Posaçme deri në marrjen e një vendimi nga institucionet e vetingut. E sot, ajo nuk mundi ta kalonte provën e ndershmërisë, duke u klasifikuar si e padenjë për drejtësinë. /tesheshi.com/
