Organizata Botërore e Shëndetit (OBSH) tha që të gjithë personat që kanë qenë në kontakt me të infektuar me virusin koronar duhet të testohen, duke patur ose jo simptoma.
Ky rekomandim i ekspertëve të OBSH-së erdhi pasi u pyetën në një konferencë për shtyp për situatën në Shtetet e Bashkuara, ku epidemiologët vlerësuan se testet nuk janë të nevojshme për ata që nuk kanë simptoma të sëmundjes.
Duke iu përgjigjur pyetjeve të reporterëve mbi këtë temë, epidemiologja e OBSH-së Maria Van Kerkhove nuk komentoi situatën në Shtetet e Bashkuara, por tha se agjensia e Kombeve të Bashkuara rekomandoi që, nëse është e mundur, të gjitha “kontaktet të testohen, pavarësisht nga zhvillimi i simptomave”.
“Ne e dimë që njerëzit që kanë simptoma transmetojnë virusin, por që dimë që dhe njerëzit që nuk kanë simptoma mund të transmetojnë virusin,” tha ajo.
Ajo theksoi rëndësinë e testeve, të cilat duhet të përdoren për të gjetur raste aktive dhe për t’i izoluar ato dhe për të kërkuar kontaktet e tyre.
Ndryshimi në udhëzimet e SHBA u bë në mënyrë diskrete të hënën në faqen e internetit të Qendrës për Parandalimin dhe Kontrollin e Sëmundjeve (CDC) dhe media paralajmëroi ndërhyrje të Shtëpisë së Bardhë në vendim.
Presidenti amerikan Donald Trump ka vlerësuar në mënyrë të përsëritur se vendit të tij i duhen më pak testime dhe se testet japin një pasqyrë të keqe të sjelljes së pandemisë së virusit koronar në Shtetet e Bashkuara. /tesheshi.com/
