Për PD-në, nuk është ajo por mazhoranca ajo që po e bllokon Reformën në Drejtësi. Në një deklarim të orëve të fundit nga çadra e protestës, kreu i PD-së Lulzim Basha ia faturoi kundërshtarit atë akuzë nën të cilën gjendet opozita që prej hyrjes në çadër afro 20 ditë më parë.
“Jemi këtu për një qëllim të madh politik e qytetar, për një kauzë europiane: zgjedhjet e lira e të ndershme. Në kushtet e kriminalizimit, në kushtet e drogës, në kushtet e mungesës totale të reformës zgjedhore, në kushtet e sabotimit të Reformës në Drejtësi nga ata që kanë frikë nga drejtësia e vërtetë, ka vetëm një zgjidhje: qeveri teknike, largimi i Edi Ramës dhe kabinetit të krimit”, shtoi Basha.
Nga ana tjetër, kreu i PD-së, tha se nuk do ketë bojkot zgjedhjesh, porse ato do jenë me patjetër të lira e të ndershme.
“Sot, dorëzojmë në KQZ ultimatumin me shkrim për zgjedhje të lira e të ndershme. Nuk do të ketë bojkot, por zgjedhje të lira e të ndershme dhe republikë të re”. /tesheshi.com/
