E fejuara turke e gazetarit të vrarë saudit Jamal Khashoggi, tha të premten se që të gjithë ata që ishin përgjegjës për vrasjen e tij duhej të silleshin para drejtësisë.
“Unë kërkoj që të gjithë ata që janë të përfshirë në këtë egërsi, nga nivelet më të larta në nivelet më të ulëta, të sillen para drejtësisë dhe të dënohen”, tha Hatice Cengiz për stacionin televiziv Haber Türk.
Ajo gjithashtu tha se nuk e pranoi ftesën e Presidentit Trump për të vizituar Shtëpinë e Bardhë, sepse mendonte se kishte për qëllim që të ndikonte në opinionin publik në favor të tij.
Cengiz tha se nuk do të shkonte në Shtëpinë e Bardhë derisa Shtetet e Bashkuara të ishin të sinqertë në përpjekjet për të zgjidhur vrasjen e Khashoggi, duke kërkuar që të gjithë ata që janë përgjegjës të gjykoheshin dhe të ndëshkoheshin.
Ajo tha se Khashoggi kishte marrë garanci që autoritetet e Arabisë Saudite nuk do t’i hapnin problem, megjithëse kishte shqetësime para se të hynte në konsullatë.
“Khashoggi nuk donte të shkonte në konsullatën saudite”, tha ajo.
Khashoggi u vra më 2 tetor pasi hyri në konsullatë për të marrë një dokument që do të lejonte që të rimartohej. /tesheshi.com/
