Nga Blendi Gashi
Këtë të mërkurë, Ramush Haradinaj ishte në paqe me deputetët opozitarë, ata të Vetëvendosjes – ku disave, konkretisht atyre të krahut anti-Kurti, iu kërkoi votat për Demarkacionin) si dhe me ata të LDK-së; por të enjten pritet të rikthehen përplasjet e zakonshme mes tyre.
Ramushi do “djersitet” jo pak nga këto parti, pasi me kërkesë të tyre do mbahen dy seanca plenare si dhe do debatohet për 100 ditët e qeverisë.
Me kërkesë të grupit parlamentar të LDK-së do mbahet interpelancë lidhur me vendimin e qeverisë së Kosovës nr.04/20 të datës 20.12.2017 për rritjen e pagave të anëtarëve të Kabinetit qeveritar, Vendimin nr. 05/24 i datës 12 janar 2018, për rritjen e pagave për të gjitha kategoritë e të punësuarave që marrin paga nga buxheti i Kosovës, si dhe Vendimi nr. 15/24 i datës 12 janar 2018 për lartësinë e pagesës mujore për familjet në Skemën e Ndihmave Sociale,
Opozitarët do i kërkojnë llogari Haradinajt për vendimin në fjalë, ku pritet të ketë përplasje të forta dhe akuza ndaj kryeministrit, edhe pse ky vendim është pezulluar, dhe i mbetet Gjykatës Kushtetuese ta thotë fjalën e saj.
Një pikë tjetër është edhe interpelanca e thirrur nga Vetëvendosje lidhur me vdekjen e aktivistit Astrit Dehari.
Vetëvendosësit do të kërkojnë nga Haradinaj që ky rast sa më parë të hetohet nga ndërkombëtarët dhe të mësohet e vërteta se në c’rrethana vdiq në burg Astriti dhe që përgjegjësit të dalin para drejtësisë, kërkesa tashmë publike këto.
Pika tjetër ku po ashtu Haradinaj do kapet me opozitarët është edhe raporti i punës së 100-ditëshit të tij. Këtë debat e ka kërkuar nënkryetari i Kuvendit nga radhët e LDK-së, Kujtim Shala dhe gjashtë deputetë tjerë nënshkrues.
Ndërsa Haradinaj pritet të mbrojë punën e tij dhe të flasë vetëm për suksese, opozita pritet t’ia numërojë dështimet siç ka bërë edhe më herët duke e quajtur një tre-mujorsh të dështuar, e ku pritet t’ia përmendë sërish emërimin e një numri rekord të zv.minsitrave dhe moskalimin e temave të mëdha për çka erdhi edhe në pushtet.
Përplasje mund të sjellë edhe shqyrtimi i propozim-vendimit të qeverisë për ratifikimin e nëntë (9) anëtarëve të Këshillit Shtetëror të Cilësisë, kjo pasi opozitarët e në veçanti LDK ka reaguar për shkarkimin e bordit të mëparshëm.
Kurse pikë tjetër ku Haradinaj do shpëtojë pa dhënë llogari, mund të jetë vetëm votimi i raportit për gjendjen e mjedisit në Kosovë për vitin 2016.
Kuvendi do të mbajë seancë edhe të premten ku do të shqyrtohen nëntë projektligje. /tesheshi.com/
