Marrëdhënia mes Ilir Metës dhe Edi Ramës rrezikon të jetë shpërthyese dhe të enjten e kësaj jave, kreu i LSI-së ka bërë planin për të rrëzuar qeverinë për ligjin e mbetjeve urbane.
Janë dy sinjale të forta nga LSI që tregojnë se situata paralajmëron furtunë.
Pas dështimit për të rrëzuar koncensionet spitalore dhe sulmit ndaj Lulzim Bashës që nuk arriti të kalojë me sukses provën me “nëndetësen 105”, Ilir Meta ka nxjerrë Luan Ramën që të bëjë thirrje për armëpushim me Lulzim Bashën, duke i kërkuar që të “rrokë armët” për të enjten e ardhshme.
Luan Rama i ka kërkuar PD-së, që të afrohet në pozicionet e LSI-së për reformën zgjedhore. Ndërkohë, ka reaguar menjëherë Taulant Balla, ku i ka bërë thirrje LSI-së që të mos bëjë edhe arbitrin edhe aleatin.
“I them mikut tim Luan Rama qe barazlargimi i tij, duke fajesuar po njesoj edhe PS edhe PD per Reformen Zgjedhore eshte i padrejte, per te mos thene me shume! Luan Rama duhet ta dije se PS dhe LSI jane bashke ne Komisionin e Reformes Zgjedhore dhe kane qendrime plotesisht te dakordesuara mbi rekomandimet e OSBE/ODHIR-it. Po ashtu Luan Rama me siguri e di qe kemi nje muaj qe presim qe PD te behet pjese konstruktive e punes se komisionit per ta mbyllur reformen. Prandaj Luan Rama le t’i beje thirrje PD sic i bejme edhe ne po ashtu, sepse roli i dyfishte i skuadres dhe arbitrit nuk ka me asnje kuptim! PS dhe LSI kane bere nje pune shume serioze ne komision dhe respekti per kete skuader eshte minimumi qe duhet te tregoje miku Luan Rama pavaresisht se mund t’i kete rene te beje pjesen e arbitrit!”, shkruan Taulant Balla në faqen e tij zyrtare në Facebook.
Ndërkohë, Edi Rama ka bërë karshillëk sot në Vlorë duke dalë në inspektimin e Lungomares vetëm me Shkëlqim Selamin, deputetin e akuzuar nga PD si i dënuar në Itali, pikërisht kur një portal pranë ish-kryeministrit Berisha e ka akuzuar Selamin se ka ikur nga Ilir Meta dhe ka kaluar me Edi Ramën.
Artur Zheji, që është njeriu besnik i Metës në media, në portalin e tij 360 gradë ka bërë numrat që sipas tij rrëzojnë qeverinë.
“Ja si rrëzohet Rama të enjten për ligjin e mbetjeve”, shkruan Zheji i cilis shpjegon se “Vetë Partia Demokratike ka në radhët e saj 45 deputetë, dhe bashkë me dy votat e Fatmir Mediut dhe Agron Dukës shkon në 47 vota.
Kjo shifër shtohet me 4 vota, pasi kundër miratimit të ligjit të mbetjeve janë deklaruar edhe deputetët pa grupe parlamentare, Ben Blushi dhe Mimoza Hafizi i LIBRA-s, Vangjel Dule i PBDNJ-së dhe Nard Ndoka i demokristianëve. Bashkë me deputetët pa grup parlamentar, PD+PR shkon në 51 vota në Kuvend.
Me këtë shifër, do të mjaftonin vetëm 20 votat e LSI-së për ta përmbysur situatën, duke rrëzuar një prej ligjeve që ka ngjallur më shumë irritim në publik dhe shoqërinë civile.
Pra nëse PD+PR me të pavarurit dhe LSI do të bashkoheshin, numrat e tyre do të shkonin në 71 vota. Shto këtu faktin se edhe Partia Drejtësi, Integrim dhe Unitet ka deklaruar votën kundër importit të mbetjeve, kjo do të mundësonte rrëzimin e nismës së maxhorancës”.
Nëse do të ndodhte kjo, normalisht nuk do të kalonte qetësisht nga Edi Rama, i cili siç ka deklaruar një muaj më parë, pret brenda dhjetorit fjalën e Ilir Metës për vazhdimin e koalicionit, përndryshe, siç u shpreh “LSI të rimartohet me PD”.
/tesheshi.com/
