Presidenti kinez Xi Jinping ka bërë thirrje për “përmbajtje më të madhe” në konfliktin ukrainas, në një apel që ai bëri së bashku me presidentin francez Emmanuel Macron dhe kancelarin gjerman Olaf Scholz, njoftoi televizioni kinez.
Kina, e cila ka mbajtur tradicionalisht lidhje të mira me Moskën, deri më tani ka refuzuar të flasë për një pushtim të Ukrainës dhe vetëm ka “shprehur keqardhje” për konfliktin në atë vend, duke thënë se ende “i kupton” shqetësimet e Rusisë për sigurinë e saj.
Por në një bisedë telefonike me Macron dhe Scholz, kreu i Pekinit tha se Kina ishte “sinqerisht e pikëlluar nga lufta e re në kontinentin evropian”, raportoi CCTV.
“Ne duam të bëjmë thirrje për përmbajtje më të madhe për të parandaluar një krizë humanitare në shkallë të gjerë”, shtoi ai, pa dënuar ofensivën e nisur nga presidenti rus Vladimir Putin më 24 shkurt kundër vendit fqinj.
Ai u tha bashkëbiseduesve të tij se “vlerëson përpjekjet e Francës dhe Gjermanisë për të ndërmjetësuar në Ukrainë” dhe vuri në dukje se Pekini është gjithashtu i gatshëm të marrë një “rol aktiv”.
“Ne duhet të punojmë së bashku për të mbështetur bisedimet e paqes midis Rusisë dhe Ukrainës,” tha ai pasi tre raunde bisedimesh në Bjellorusi deri më tani nuk kanë arritur të ndalojnë luftën, duke shtuar:
“Kina është e gatshme të dërgojë ndihma humanitare në Ukrainë”, tha ai.
Xi përsëriti se vendi i tij kundërshton sanksionet ndërkombëtare në parim, duke thënë se masat e vendosura ndaj Moskës do të “dëmtonin të gjitha palët”. /tesheshi.com/
