U përcoll si lajm normal një turfullim me nuanca depresive e deputetes Rudina Hajdari një ditë më parë në parlament. Me një shqipe gunga-gunga në fjalëformim, plus tonalitetit deri në ngjirje e shformim grimasor, ajo me gjasë ka lënë një shije keqardhëse te ata mijëra shqiptarë që e kanë ndjekur teksa fliste në podium e më pas e bllokonte atë pa pikë kuptimi.
Nuk është e vështirë të dallohet një vetërezervim mediatik në trajtimin e performancës tejet të diskutueshme politike të bijës së të ndjerit Azem Hajdari. Pos kësaj shenje, pra të qënit e bija e një figure emblematike, ajo nuk ka kurrfarë të dhëne tjetër të dukshme për të qenë aktore politike.
Siç dihet, ishte një rrethanë e caktuar, ajo e mosdorëzimit të mandatit në kohën kur këtë e bëri gjithë partia e saj në parlament, që i hodhi prozhektorët e interesit mediatik te znj.Hajdari. Ç’prej atëhere, ajo ka tentuar të imponohet panatyrshëm si personazh me peshë politike, shoqëruar nga një naivitet i dukshëm, deri anekdodik, gjë të cilën ia injekton dhe medias në çastin kur pikëtakohet me të. Të intervistosh Rudina Hajdarin apo të kesh mikrofonin të drejtuar kah saj në prononcimet e zakonshme, duhet të vesh në diskutim inteligjencën e nevojshme për të qënit gazetar.
Por çfarë ndodh: fakti që ajo, znj.Hajdari përcjell një brishtësi deri dhe fëminore më shumë se sa femërore, të detyron dhe një lloj përkorësie mbushur me mëshirim.
Fjalëmbajtja e saj një ditë më parë, dramatike e komike njëherësh, te dikush tjetër, burrë apo grua e burrëruar, do bëhej leckë në rrjete sociale.
Brenda dhjetra fjalëve lëshuar rifuxho në eter, pa asnjë lloj estetike leksikore, ajo përcolli si delir të pagëlltitshëm madhështie – kur thoshte se kishte marrëveshje me shqiptarët(!!!) – e si nonsense të pafalshme politike, siç deklarimi se nga ai parlament ishin urdhëruar njerëzit që të fusnin lekët në firmat piramidale(!!!).
Nga ana tjetër, fakti që ajo është edukuar apo arsimuar në SHBA, është diçka komplekt inegzistente në performancën e saj, ngjashëm si te Basha për të cilin vijon të ushqehet miti i “formimit perëndimor” të tij, meqë ka mbarruar studimet në Hollandë (ku, si, në ç’drejtim, në ç’detaje?).
Për znj.Hajdari vlen vetëm një gjë: dikush duhet ta shpëtojë! Ky dikush, është zakonisht një njeri me peshë ne jetën e saj, mundet dhe një mikeshë e ngushtë, që ti thotë se Zoti mund t’i ketë dhënë të tjera aftësi ku mund të shkëlqejë, edhe pa qenë doemos figurë publike, por qartësisht e pa diskutim, duke mos qenë protagoniste politike. /tesheshi.com/
