Përse duartrokasin njerëzit kur aeroplani ulet në tokë? Me siguri që e keni pyetur veten ndonjëherë dhe, në qoftë se keni menduar se përgjigja është për shkak se piloti ka ulur me sukses avionin në tokë, atëherë e keni gabim.
Stjuardesa Kara Mulder ka ndarë mendimin e saj për këtë çështje në blogun Flight Attendant Life (Jeta e një stjuardese). Ajo thotë se kjo dukuri lidhet kryesisht me destinacionin tuaj. Nëse shkoni për në New York, për shumicën e njerëzve (të paktën amerikanëve), ky është një udhëtim biznesi. Nëse shkoni në Las Vegas, atëherë shkoni për argëtim, ndaj edhe është mëse normale që udhëtarët do të duartrokasin për në destinacionin e fundit.
Bazuar në përvojën e saj, piloti zakonisht merr duartrokitje në qoftë se e ul aeroplanin me sukses në tokë përkundër motit të keq apo ndonjë pengese tjetër.
Disa udhëtarë të cilët janë shpesh në aeroplan, kanë vënë re se duartrokitjet zakonisht ndodh kur njerëzit kthehen nga diaspora në atdhe, tek familja e tyre të cilën nuk e kanë parë për një kohë të gjatë (dhe në këtë kategori padyshim bëjnë pjesë edhe shqiptarët).
Një faktor tjetër që ndikon në duartrokitje është shpeshtësia e udhëtimeve. Nëse jeni çdo dy javë në aeroplan, sigurisht se nuk do të duartrokitni çdo herë që uleni në tokë.
Nëse ju vetë nuk keni filluar të duartrokisni dhe nuk e shihni se kush po duartroket, është e mundur që këtë ta ketë bërë vetë stjuardesa vetëm për argëtim. /tesheshi.com/
