Goditjet e reja, të pasuara me shpërthime, tronditën Stepanakertin, qyteti më i madh në rajonin e Nago-Karabakut, ku përleshjet midis forcave armene dhe azerbajxhanase po ndodhin këtë të dielë.
Sirenat e alarmit ranë në qytet rreth orës 9:30 të mëngjesit me kohën lokale (7:30 paradite CET), pak para se të dëgjoheshin shpërthime të shumta, njoftoi AFP.
Autoritetet azerbajxhanase kanë thënë se ata kanë marrë “masa hakmarrëse” pas sulmeve me raketa nga forcat armene nga Stepanakert.
Ditët e fundit, ka pasur disa sulme të tilla ndaj këtij qytet, gjë e cila ka detyruar popullsinë të fshihet në bodrume dhe strehimore.
Shkatërrimi në qendër të qytetit është i kufizuar, vunë në dukje reporterët e AFP.
Nga ana tjetër, Ministria e Mbrojtjes e Azerbajxhanit tha se “forcat armene nga Kankendi (emri azerbajxhanas për Stepanakert) qëlluan me raketa në qytetet Terter dhe Horadiz, në zonën e Fizuli”.
“Ushtria azerbajxhanase ka marrë masa të përshtatshme shpaguese kundër armikut,” tha Ministria e Mbrojtjes e Baku.
Një konflikt i ri midis Armenisë dhe Azerbajxhanit shpërtheu në 27 shtator dhe është më i ashpri që nga viti 1994, kur mbaroi lufta midis dy vendeve.
Agjencitë thonë se të paktën 240 njerëz janë vrarë që nga fillimi i konfliktit.
Nagorni-Karabak është një enklavë etnike armene brenda Azerbajxhanit, e cila ka qenë jashtë kontrollit të Baku-së që nga fundi i luftës së vitit 1994.
Të dy palët kanë një prani të fortë ushtarake përgjatë zonës së çmilitarizuar që ndan rajonin nga pjesa tjetër e Azerbajxhanit. /tesheshi.com/
