Era e fortë dhe shiu i rrëmbyer e kanë shoqëruar nisjen e kësaj të dielë në tërë vendin.
Në Tiranë ka një prani të konsiderueshme të ujit në një sërë rrugësh, në Durrës e Vlorë raportohet të ketë erë të fortë, që ka penguar lëvizjen normale të trageteve, e në veri të vendit mungon energjia elektrike.
Rruga “Karl Gega” në Tiranë është përmbytur, e bashkë me të janë pushtuar nga uji dhe disa shtëpi.
Në Durrës, trageti “Rapsodi” sapo është ankoruar në port, pasi kaloi 24 orë në det, në pamundësi për t’iu afruar bregut për shkak të dallgëve dhe erës së fortë. Dy tragete të tjera priten akoma të ankorohen.
Në Pukë, Fushë-Arrëz e Kukës, si dhe në periferitë e këtyre qyteteve ka patur ndërprerje të gjata të energjisë elektrike.
Po ashtu në Dibër ka patur dëmtime për shkak të rrebeshit dhe erës.
Në Vlorë, anijet e peshkimit nuk lejohet të dalin në det. Mungesa e energjisë elektrike është e pranishme dhe në këtë qytet. /tesheshi.com/
